ສົກປີນີ້ແຂວງຫົວພັນໄດ້ຕັ້ງ ເປົ້າໝາຍສູ້ຊົນຈະຈັດເກັບລາຍຮັບເຂົ້າງົບປະມານຂອງລັດໃຫ້ໄດ້ທັງໝົົດ 40 ກວ່າຕື້ກີບ ໃນນັ້ນ ຫຼາຍກວ່າ ໝູ່ແມ່ນຈາກສ່ວຍສາອາກອນ, ການຄຸ້ມຄອງຊັບສິນຂອງລັດ, ພາສີ ແລະ ແຫຼ່ງລາຍຮັບອື່ນໆອີກຈຳນວນໜຶ່ງ.
ກອງປະຊຸມຂັ້ນວິຊາການວຽກງານການເງິນທົ່ວແຂວງຫົວພັນປະຈຳສົກປີ 2013-2014 ທີ່ຈັດຂຶ້ນເມື່ອບໍ່ດົນຜ່ານມານີ້ ໄດ້ຍົກໃຫ້ເຫັນຄາດໝາຍສູ້ຊົນໃນການຈັດເກັບລາຍຮັບມອບເຂົ້າງົບປະ ມານຂອງແຂວງໃນສົກປີນີ້ຈະໃຫ້ບັນລຸ ໄດ້ 48.729 ລ້ານກີບ ກວມເອົາ 2,37% ຂອງຄາດໝາຍລວມຍອດຜະ ລິດຕະພັນພາຍໃນທຽບໃສ່ແຜນການ ດັດແກ້ສົກປີກ່ອນເພີ່ມຂຶ້ນ 0,62%.
ໃນນີ້ລາຍຮັບຈະເກັບໄດ້ຈາກສ່ວຍສາອາກອນ 38,82 ຕື້ກີບ ເພີ່ມຂຶ້ນ3,74%, ຮວ່ງລາຍຮັບພູດພາສີຂອງແຂວງ 3,25 ຕື້ກີບ ເພີ່ມຂຶ້ນ 2,81%, ລາຍ ຮັບຈາກການຄຸ້ມຄອງຊັບສິນຂອງລັດ 6,65 ຕື້ກີບ ເພີ່ມຂຶ້ນ
8,10% ແລະ ລາຍຮັບຈາກການດຸ່ນດ່ຽງງົບປະມານ ຮວ່ງຕ່າງໆ 379 ລ້ານກວ່າກີບ, ເພີ່ມຂຶ້ນ 2,56% ຂະນະທີ່ການປະຕິບັດດ້ານລາຍຈ່າຍໃຫ້ບັນລຸ 428 ລ້ານກວ່າ ກີບ ທຽບໃສ່ປີຜ່ານມາເພີ່ມຂຶ້ນ 2,34%.
ແນວໃດກໍດີ ເພື່ອເຮັດໃຫ້ແຜນສູ້ຊົນໃນການເກັບລາຍຮັບບັນລຸຕາມແຜນການ ແລະ ລື່ນແຜນການທຸກພາກສ່ວນນັບແຕ່ຂັ້ນແຂວງລົງຮອດທ້ອງຖິ່ນຈະຕ້ອງໄດ້ເປັນເຈົ້າການຮ່ວມມືກັນໃນ ການປະຕິບັດລາຍຮັບ-ລາຍຈ່າຍຕາມຂອບເຂດຄວາມຮັບຜິດຂອງຕົນໃຫ້ໄດ້ຕາມຄາດໝາຍເພີ່ມທະວີຄວາມເຂັ້ມງວດໃນການຕິດຕາມຄຸ້ມຄອງການລົງທຶນຂອງລັດໃຫ້ຖືກຕ້ອງຕາມລະບຽບການຈັດຊື້, ຈັດຈ້າງເພື່ອຫຼຸດຜ່ອນບໍ່ໃຫ້ໜີ້ສິນເພີ່ມຂຶ້ນ.
ຕັ້ງໜ້າແກ້ໄຂສິ່ງຫຍໍ້ທໍ້ໃນຂົງເຂດການເງິນນັບແຕ່ຂັ້ນແຂວງລົງຮອດທ້ອງຖິ່ນໃຫ້ໄດ້ຢ່າງເດັດຂາດ, ກວດກາດ້ານການເງິນງົບປະມານ, ປະຕິບັດວິໄນຕໍ່ບຸກຄົນ ແລະ ການຈັດຕັ້ງທີ່ລະເມີດຕໍ່ ລະບຽບກົດໝາຍທາງການເງິນ, ສູ້ຊົນເຮັດໃຫ້ງົບປະມານການເງິນຂອງແຂວງມີຄວາມໝັ້ນທ່ຽງ, ສາມາດເປັນເຈົ້າຕົນເອງເທື່ອລະກ້າວ ແລະ ທັງຮັບປະກັນການເບີກຈ່າຍເງິນເດືອນ ແລະ ເງິນນະໂຍບາຍຮ່ວງຕ່າງໆໃຫ້ທັນຕາມກຳນົດເວລາ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ