ຂປລ. ພິທີຕ້ອນຮັບຂະບວນຄາລະວານຕາມຮອຍປະທານ ໄກສອນ ພົມວິຫານ, ຫວນກັບຢ້ຽມຢາມຖິ່ນກໍາເນີດຂອງ ສປປ ລາວ ແລະ ງານຊຸມນຸມລະນຶກວັນຄ້າຍວັນເກີດ ທ່ານ ໄກສອນ ພົມວິຫານຄົບຮອບ 95 ປີໄດ້ຈັດຂຶ້ນຢ່າງຍິ່ງໃຫຍ່ທີ່ເມືອງວຽງໄຊ ແຂວງຫົວພັນໂດຍເປັນກຽດເຂົ້າຮ່ວມຂອງ ທ່ານ ທອງສິງ ທໍາມະວົງ ນາຍົກລັດຖະມົນຕີ ພ້ອມບັນດາລັດຖະມົນຖະມົນຕີ, ລັດຖະມົນຕີຊ່ວຍວ່າການ, ເຈົ້າແຂວງ, ຜູ້ອາວຸໂສ ແລະ ເຈົ້າໜ້າທີ່ກ່ຽວຂ້ອງ.
ໃນໂອກາດດັ່ງກ່າວນີ້, ທ່ານ ວັນໄຊ ແພງຊຸມມາ, ເລຂາພັກແຂວງໆຫົວພັນໄດ້ກ່າວ: ການຈັດຂະບວນຄາລະວານຄັ້ງນີ້ແມ່ນມີຄວາມໝາຍ ແລະ ຄວາມສໍາຄັນຢ່າງຍິ່ງທີ່ທົ່ວພັກ ແລະ ປວງຊົນລາວທັງຊາດໄດ້ສະເຫລີມສະຫລອງວັນສະຖາປະນາ ສປປ ລາວຄົບຮອບ 40 ປີ
ໃນບາງແຂວງກໍສໍາເລັດ ແລະ ບາງແຂວງຍັງສືບຕໍ່ດໍາເນີນໄປດ້ວຍບັນຍາກາດຟົດຟື້ນໂດຍສະເພາະຊາວແຂວງຫົວພັນພວກເຮົາຫາກໍດໍາເນີນການສະເຫລີມສະຫລອງວັນສະຖາປະນາ ສປປ ລາວຄົບຮອບ 40 ປີຢ່າງຄຶກຄື້ນມ່ວນຊື່ນ ແຕ່ພິເສດພວກເຮົາພ້ອມຊາວເມືອງວຽງໄຊສຸດທີ່ເປັນກຽດ ແລະ ປິຕິຊົມຊື່ນທີ່ໄດ້ຄໍານັບຮັບຕອ້ນຂະບວນຕາມຮອຍປະທານ ໄກສອນ ພົມວິຫານ ແລະ ຫວນກັບຢ້ຽມຢາມຖິ່ນກໍາເນີດຂອງ ສປປ ລາວ.
ທ່ານ ເລຂາພັກແຂວງຫົວພັນຍັງໄດ້ຍົກໃຫ້ເຫັນເນື້ອໃນບາງຕອນສໍາຄັນວ່າ: ດີນແດນທົ່ງນາໄກ່ ເມືອງວຽງໄຊເປັນດີນແດນທີ່ສັກກະລະບູຊາໃນປະຫວັດສາດຂອງຊາວລາວ ອັນເນື່ອງມາຈາກເປັນບ່ອນຢູ່ອາໃສ ແລະ ເຄື່ອນໄຫວຊີ້ນໍາໆພາການປະຕິວັດປົດປ່ອຍຊາດຂອງບັນດາທ່ານຜູ້ນໍາປະຕິວັດ, ເປັນບ່ອນເຕົ້າໂຮມຫລໍ່ຫລອມກໍາລັງປະຕິວັດໃຫ້ເຕີບໃຫຍ່ຂະຫຍາຍຕົວສາມາດເຮັດສໍາເລັດພາລະກໍາປົດປ່ອຍຊາດ ຍາດເອົາເອກະລາດ-ປະກາດສ້າງຕັ້ງ ສປປ ລາວຂຶ້ນໃນວັນທີ 2 ທັນວາ 1975 ມາເປັນໄຊຊະນະອັນຍິ່ງໃຫຍ່ໃນປະຫວັດສາດຂອງຊາດລາວທີ່ຫລຸດພົ້ນອອກຈາກແອກປົກຄອງກົດຂີ່ຂົ່ມເຫັງຂອງຈັກກະພັດຕ່າງດ້າວ ແລະ ກ້າວເຂົ້າສູ່ສັງກາດໃໝ່-ສັງກາດທີ່ປະຊາຊົນລາວໄດ້ເປັນເຈົ້າຂອງປະເທດຊາດ, ເປັນເຈົ້າຕົນເອງສ້າງສາພັດທະນາປະເທດຊາດໃນເງື່ອນໄຂປະເທດມີສັນຕິພາບ, ເອກະລາດ, ປະຊາທິປະໄຕ,ເອກະພາບກ້າວຂຶ້ນສູ່ຄວາມວັດທະນາຖາວອນໂດຍມີທີ່ຕັ້ງຄົບຖ້ວນ ແລະ ມີຖານະທຽບເທົ່າກັບນາໆຊາດໃນວົງຄະນະຍາດສາກົນສົມກັບຄໍາຂະໜານາມວ່າວຽງໄຊເປັນຖິ່ນກໍາເນີດຂອງ ສປປ ລາວ.
ແນວໃດກໍດີ ທ່ານ ວັນໄຊ ແພງຊຸມມາຢືນຢັນວ່າ: ພວກເຮົາການນໍາແຂວງ-ການນໍາເມືອງຈະສືບຕໍ່ນໍາພາພັດທະນາເມືອງວຽງໄຊໃຫ້ກາຍເປັນແຫລ່ງທ່ອງທ່ຽວທາງປະຫວັດສາດ, ທໍາມະຊາດ ແລະ ວັດທະນະທໍາທີ່ເຕັມໄປດ້ວຍເຊື່ອໝັ້ນ ແລະ ອຸດົມການຂອງພັກເພື່ອດຶງດູດເອົາຊາວລາວທັງຊາດ ແລະ ແຂກຕ່າງປະເທດເຂົ້າມາທ່ຽວຊົມໃຫ້ນັບມື້ນັບຫລາຍຂຶ້ນໂດຍເນັ້ນໃສ່ໃຫ້ເຂົາເຈົ້າເຫັນເຖິງພາບຟົດການດໍາລົງຊີວິດທີ່ທຸກຍາກລໍາບາກຂອງ ທ່ານ ໄກສອນ ພົມວິຫານ, ທ່ານ ສຸພາ ນຸວົງ ແລະ ທ່ານຜູ້ນໍາອື່ນໆທີ່ຢູ່ຕາມຮອມຜາ, ຮູ ແລະ ຖໍ້າຕ່າງໆເພື່ອຊີ້ນໍາໆພາການປະຕິວັດ, ອຸດົມການຂອງພັກ, ອຸດົມການຂອງສັງຄົມນິຍົມ, ເພື່ອຊີວິດການເປັນຢູ່ທີ່ດີຂອງປະຊາຊົນນັບມື້ນັບດີຂຶ້ນ ພ້ອມຈະເຜີຍແຜ່ ແລະ ປູກຈິດສໍານຶກໃຫ້ທຸກຊັ້ນຄົນຮໍ່າຮຽນເອົາບົດຮຽນຍອດຍິ່ງຂອງເພີ່ນ ແລະ ຄຸນສົມບັດສິນທໍາປະຕິວັດຂອງເພີ່ນຢ່າງແທ້ຈິງ.
ແຫລ່ງຂ່າວ: ສຳນັກຂ່າວປະເທດລາວ