ທ່ານ ຮສຈ.ດຣ ກອງສີ ແສງມະນີ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ເມື່ອບໍ່ດົນມານີ້ ວ່າ:
ໃນສົກຮຽນ 2013-2014 ຜູ້ທີ່ເຂົ້າຮຽນສະເພາະຢູ່ສະຖາບັນອາຊີວະສຶກສາ 8 ແຫ່ງປະມານ 15 ພັນກວ່າຄົນ, ລະດັບອະນຸປະລິນຍາ 17 ພັນກວ່າຄົນ, ລະດັບປະລິນຍາຕີ 17 ພັນກວ່າຄົນ ແລະ ນັກສຶກສາໄປຮຽນຕໍ່ຕ່າງປະເທດ ປະມານ 500 ກວ່າຄົນ ນອກນີ້ນັກສຶກສາຊັ້ນສູງ ແລະ ມະຫາວິທະຍາໄລຍັງຈະໄດ້ຮັບທຶນການສຶກສາຂອງລັດ 20%, ໂດຍຈະບັນຈຸເຂົ້າໃນວິທະຍາໄລໃນລະດັບຕ່າງໆ.
ໃນສົກຮຽນ 2012 -2013 ທີ່ຜ່ານມາ ການສຶກສາໃນຊັ້ນມັດທະຍົມສຶກສາທັງພາກລັດ ແລະ ເອກະຊົນໄດ້ມີນັກຮຽນຊັ້ນມັດທະຍົມສຶກສາທັງໝົດ 543.289 ຄົນ, ຍິງ 251.142 ຄົນໃນໂຮງຮຽນທັງໝົດ 1.494 ແຫ່ງ ສຳລັບ ມ 7 ທັງພາກລັດ ແລະ ເອກະຊົນ ທີ່ເສັງຈົບໃນສົກປີ 2012-2013 ມີຈຳນວນ 46.340 ພັນຄົນໃນທົ່ວປະເທດ. ພ້ອມນີ້ກະຊວງສຶກສາທິການ ແລະ ກິລາໄດ້ສຶບຕໍ່ສົ່ງເສີມການຂະຫຍາຍໂອກາດເຂົ້າຮຽນໂດຍໄດ້ເລັ່ງໃສ່ ກຸ່ມຜູ້ດ້ອຍໂອກາດ,ຜູ້ທຸກຍາກ, ແມ່ຍິງ, ຊົນເຜົ່າທີ່ຢູ່ຫ່າງໄກສອກຫລີກໄດ້ເຂົ້າເຖິງການສຶກສາຊັ້ນສູງ ແລະ ກຳນົດນະໂຍບາຍຄື: ໄດ້ໃຫ້ທຶນການສຶກສາ 35% ໃນຈຳນວນນັກສຶກສາຊັ້ນສູງທັງໝົດ ຊຶ່ງຈຳນວນດັ່ງກ່າວແມ່ນມອບໃຫ້ແກ່ຜູ້ດ້ອຍໂອກາດລວມທັງຜູ້ທຸກຍາກ, ແມ່ຍິງທີ່ຢູ່ຫ່າງໄກສອກຫລີກ ແລະ ນັກຮຽນເກັ່ງທີ່ເສັງຈົບ ມ 7 ນອກນັ້ນໄດ້ກຳນົດນະໂຍບາຍໃຫ້ສັງຄົມມີສ່ວນຮ່ວມໃນການພັດທະນາການ ສຶກສາຊັ້ນສູງໂດຍໃຫ້ສັງຄົມ, ພໍ່ແມ່ຜູ້ປົກຄອງນັກສຶກສາຈ່າຍຄ່າຮຽນ 65% ເພື່ອໃຫ້ມີງົບປະມານຮັບໃຊ້ການບໍລິການຄຸ້ມຄອງ, ປັບປຸງດ້ານວັດຖຸອຸປະກອນການຮຽນ -ການສອນ, ສົ່ງເສີມການຄົ້ນຄວ້າວິທະຍາສາດ ແລະ ກໍ່ສ້າງພື້ນຖານໂຄງລ່າງຂອງບັນດາມະຫາວິທະຍາໄລເປັນຢ່າງດີໂດຍ ສົມທົບກັບງົບປະມານທີ່ໄດ້ຮັບການສະໜັບສະໜູນຈາກລັດຖະບານ ແລະ ສາກົນ. ພ້ອມນີ້ ເພື່ອປັບປຸງຄືນໃໝ່ແຜນຍຸດທະສາດການພັດທະນາວຽກງານກິລາ-ກາຍະກຳ ແຫ່ງຊາດແຕ່ນີ້ຫາປີ 2020 ໂດຍເນັ້ນເຮັດໃຫ້ວຽກງານກິລາ- ກາຍະກຳຕິດແໜ້ນກັບການພັດທະນາຊັບພະຍາກອນມະນຸດຕາມ 5 ຫລັກມູນການສຶກສາ ໂດຍໄດ້ເລັ່ງພັດທະນານັກກິລາລາວປະເພດຕ່າງໆຕາມເງື່ອນໄຂ ແລະ ທ່າແຮງປະເທດເຮົາ ເພື່ອກຽມຄວາມພ້ອມເຂົ້າຮ່ວມການແຂ່ງຂັນລະດັບອະນຸພາກພື້ນ ແລະ ສາກົນ. ພິເສດໃນສົກຮຽນ 2013- 2014 ນີ້ ກະຊວງສຶກສາທິການ ແລະ ກິລາ ຍັງໄດ້ສ້າງຕັ້ງໂຮງຮຽນພອນສະຫວັນດ້ານການກິລາຂຶ້ນ 1 ແຫ່ງ ຢູ່ສູນເຝິກສີເກີດ ຊຶ່ງໄດ້ເລີ່ມເປີດການຮຽນ- ການສອນແລ້ວ./.
ແຫລ່ງຂ່າວຈາກ: ສຳນັກຂ່າວສານປະເທດລາວ