ຮ່ວມຂະບວນຄາຣາວານສູ່ ແຂວງ ບໍລິຄຳໄຊ - ຊຽງຂວາງ ແລະ ຫົວພັນ

ເພື່ອເປັນການສົ່ງເສີມການທ່ອງທ່ຽວ ພາຍໃນລາວທ່ຽວ ລາວ, ທ່ຽວຊົມບັນດາແຫລ່ງທ່ອງທ່ຽວທຳມະຊາດວັດ ທະນະທຳ ແລະ ປະຫວັດ ສາດອັນໂດດເດັ່ນຂອງພາກ ເຫນືອ ທີ່ມີຄວາມສວຍງາມອຸດົມສົມບູນຂອງທິວທັດ ທຳມະຊາດ ແລະ ພູຜາປ່າໄມ້ ແລະ ຮີດຄອງປະເພນີວັດ ທະນະທຳອັນດີງາມຂອງປະຊາຊົນລາວບັນດາເຜົ່າ ແລະ ວັດວາອາຮາມຮ່ອງຮອຍປະ ຫວັດສາດຂອງສົງຄາມ ທີ່ທາງພາກເຫນືອຂອງລາວ ແລະ ເພື່ອເປັນການໂຄສະນາ ສປປລາວປະເທດທີ່ຫນ້າທ່ອງທ່ຽວທີ່ສຸດໃນໂລກ 2013 ນັ້ນ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວຮ່ວມກັບສະມາຄົມທຸລະກິດທ່ອງທ່ຽວລາວ ຈະໄດ້ຈັດ
ຂະບວນຄາຣາວານສູ່ບັນດາແຂວງພາກເຫນືອຂອງລາວ ໂດຍຜ່ານແຂວງ ບໍລິຄຳໄຊ, ແຂວງ ຊຽງຂວາງ  ແລະ ແຂວງຫົວພັນ.
   ຂະບວນຄາຣາວານຈະໄດ້ເລີ່ມອອກເດີນທາງໃນຕອນເຊົ້າຂອງວັນທີ 31 ຕຸລາ 2013 ຈາກເດີນທາດຫລວງນະຄອນຫລວງວຽງຈັນ ໄປຜ່ານເມືອງ ປາກຊັນ, ແຂວງ ບໍລິຄຳໄຊ ເຂົ້າສູ່ເມືອງຄູນ ແຂວງ ຊຽງຂວາງ ທ່ຽວຊົມວັດທາດຝຸ່ນ, ວັດເພັຍວັດ, ວັດທີ່ມີຄວາມເກົ່າແກ່ ແລະ ມີຮ່ອງຮ່ອຍຂອງສົງຄາມທຳລາຍ ແລະ ເດີນທາງນອນພັກ ແຮມທີ່ໂພນສະຫວັນ, ຊົມການສະແດງສິລະປະພື້ນເມືອງຂຶ້ນພູຊ້າງ, ສຳຜັດລົມຫນາວ, ຊົມຄວາມງາມທິວທັດທຳມະຊາດຂອງຕົວເມືອງ, ຊີມລົດຊາດອາຫານພື້ນບ້ານ, ຈາກນັ້ນກໍ່ຈະເດີນທາງໄປທ່ຽວຊົມ ທົ່ງໄຫຫີນ 1 ແລະ 2 ສະຖານບູຮານ ແລະ ຮ່ອງ ຮອຍປະຫວັດສາດເສັ້ນທາງທີ່ກອງພັນທີສອງຜ່າວົງປິດລ້ອມ, ຊົມອະນຸສອນສະຖານ ຖ້ຳປິວ ແລະ ສະຖານທີ່ສຳຄັນຕ່າງໆຂອງແຂວງ ຊຽງຂວາງ.ຈາກນັ້ນໃນວັນທີ 2 ພະຈິກ 2013ກໍ່ຈະເດີນທາງຕໍ່ໄປແຂວງ ຫົວພັນເຂົ້າສູ່ເຂດຖານທີ່ຫມັ້ນການປະຕິວັດທີ່ເຕັມໄປ ດ້ວຍຮ່ອງຮອຍປະຫວັດສາດ,ເບິ່ງຖ້ຳຜູ້ນຳໃນສະໄຫມຕໍ່ສູ້ປະຕິວັດຮ່ວມບູຊານະມັດສະການພະທາດອົງຕື້ ແລະ ເບິ່ງວິຖີຊີວິດຂອງປະຊາຊົນບັນດາເຜົ່າ ແຂວງ ພາກເຫນືອ ທີ່ຫລາຍຄົນກໍ່ມີຄວາມ ຫມາຍປອງຢາກຈະເຫັນຫນ່ວຍແກ້ວດອກຟ້າເມືອງຊຳແຈ່ວປາບ້ຳຊຳເຫນືອຕາມເສັ້ນ ທາງຜ່ານ ກໍ່ຈະແວ່ຊົມນ້ຳຕົກຕາດສະເຫລີຍ ຊຶ່ງເປັນນ້ຳຕົກທີ່ມີຄວາມສວຍງາມຢ້ຽມ ຢາມຊົມກຸ່ມຫັດຖະກຳຕ່ຳສິ້ນມັດຫມີ່ຍ້ອມສີທຳມະຊາດ ແລະ ສະຖານທີ່ຕ່າງໆ.
   ບັນດາທ່ານອົງການຈັດຕັ້ງທັງພາກລັດ ແລະ ເອກະຊົນ ຕະຫລອດຮອດພະນັກງານ ພໍ່ແມ່ປະຊາຊົນ ນັກທຸລະກິດ ທີ່ມີຈຸດປະສົງ ຈະເດີນທາງຮ່ວມໃນຂະບວນຄາຣາວານ ຄັ້ງນີ້ກໍ່ສາມາດເຂົ້າຮ່ວມເດີນທາງໄດ້ໂດຍຕິດຕໍ່ໄປຍັງກົມໂຄສະນາການທ່ອງທ່ຽວ. ສະມາຄົມ ທຸລະກິດການທ່ອງທ່ຽວລາວ.
Tel: 020 55649105, 020 55910156, 021 212248
ແຫລ່ງຂ່າວຈາກ: ຫນັງສືພີມປະຊາຊົນ