ທ່ານ ສຈ. ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ໄດ້ຖະແຫລງຕໍ່ສື່ມວນຊົນໃນງານລະດົມທຶນປະກອບສ່ວນຂະບວນຄາຣາວານ ລົດທ່ອງທ່ຽວສູ່ບັນດາແຂວງ ພາກເຫນືອໃນວັນສຸກ
(ວັນທີ 27 ທັນວາ 2013) ທີ່ຫໍວັດທະນະທຳແຫ່ງຊາດວ່າ: ງານຂະບວນຄາຣາວານລົດທ່ອງທ່ຽວສູ່ບັນດາແຂວງພາກເຫນືອສູ່ ຖິ່ນກຳເນີດຂອງກອງທັບປະຊາຊົນລາວ ເລີ່ມຈາກນະຄອນຫລວງວຽງຈັນ ຜ່ານແຂວງບໍລິຄຳໄຊ, ຊຽງຂວາງເຂົ້າສູ່ແຂວງຫົວພັນສະເຫລີມສະຫລອງວັນສ້າງຕັ້ງກອງທັບ ປະຊາຊົນລາວຄົບຮອບ 65 ປີ (20 ມັງກອນ 1949Œ-20 ມັງກອນ 2014) ທີ່ຈະມາເຖິງນີ້, ທັງເປັນການໂຄສະນາ ສປປ ລາວ ປະເທດທີ່ຫນ້າທ່ອງທ່ຽວທີ່ສຸດໃນໂລກ ປີ 2013 ແລະ ສົ່ງເສີມການທ່ອງທ່ຽວພາຍໃນ “ລາວທ່ຽວລາວ” ຈັດໂດຍກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບໂດຍ ຈະເລີ່ມອອກເດີນທາງຈາກນະຄອນຫລວງວຽງຈັນ ນັບແຕ່ວັນທີ 8Œ13 ມັງກອນ 2014 ຕາມເສັ້ນທາງທີ່ມີຄວາມຍາວ 670 ກິໂລເມັດ, ໃຊ້ເວລາ 5 ຄືນ 6 ວັນ ເຊິ່ງຜູ້ເຂົ້າຮ່ວມນຳຂະບວນຈະຢ້ຽມຊົມສະຖານທີ່ທ່ອງທ່ຽວອັນໂດດ ເດັ່ນຂອງພາກເຫນືອຂອງລາວເປັນຕົ້ນ: ຄວາມສວຍສົດງົດງາມຂອງພູຜາປ່າໄມ້, ວັດທະນະທຳຮີດຄອງປະເພນີປະຊາຊົນບັນດາເຜົ່າ, ວັດວາອາຮາມ ແລະ ຮ່ອງຮອຍທາງປະຫວັດສາດສົງຄາມ, ຄຽງຄູ່ກັບຄວາມອຸດົມສົມ ບູນທາງດ້ານແຫລ່ງທ່ອງທ່ຽວທຳມະ ຊາດ ແລະ ວັດທະນະທຳທີ່ໄດ້ກ່າວ ມານັ້ນປະເທດພວກເຮົາຍັງມີຮ່ອງຮ່ອຍ ທາງປະຫວັດສາດຫລາຍພັນປີ ເຊິ່ງຢັ້ງຢືນເຖິງຄວາມເປັນຊາດທີ່ເກົ່າແກ່, ທີ່ໄດ້ຮັບການປົກປັກຮັກສາ ແລະ ສ້າງສາໃຫ້ມີຄວາມຮຸ່ງເຮືອງມາໃນຫລາຍຍຸກຫລາຍສະໄຫມເຊັ່ນ: ທ່ຽວຊົມວັດເພຍວັດ, ພະທາດຝຸ່ນເມືອງຄູນ,ທົ່ງໄຫຫີນ 1, ບ່ອນຜະລິດໄຫຫີນທີ່ພູເກັງ,ອະນຸສອນສະຖານຖ້ຳປິວທີ່ເມືອງຄຳ, ຢ້ຽມຢາມກຸ່ມຫັດຖະກຳຕ່ຳສີ້ນຫມີ່ຍ້ອມສີທຳມະຊາດ, ນ້ຳຕົກຕາດສະເຫລີ້ຍ ເມືອງຊຳເຫນືອ ແລະ ທ່ຽວຊົມສະຖານ ທີ່ທ່ອງທ່ຽວບັນດາຖ້ຳທ່ານຜູ້ນຳ,ຖ້ຳຊ້າງລອດ, ຖ້ຳທູດຈີນ, ຖ້ຳນົກແອ່ນທີ່ເມືອງວຽງໄຊ, ດິນແດນຖິ່ນກຳເນີດຂອງ ສປປ ລາວ ເຊິ່ງປະຈຸບັນໄດ້ກາຍເປັນພິພິທະພັນການແຈ້ງ ແລະ ໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນ ແລະ ຕ່າງປະເທດທີ່ໄດ້ໄປຢ້ຽມຢາມສະຖານທີ່ດັ່ງກ່າວ.
ໂອກາດດັ່ງກ່າວບັນດາບໍລິສັດຫ້າງຮ້ານຫົວຫນ່ວຍທຸລະກິດຈາກ ພາກສ່ວນຕ່າງໆໄດ້ໃຫ້ການປະກອບສ່ວນແກ່ງານຂະບວນຄາຣາວານລົດ ທ່ອງທ່ຽວປະກອບມີດັ່ງນີ: ວິສາຫະກິດໂຮງພິມປະຊາຊົນ 5 ລ້ານກີບ, ກຸ່ມບໍລິສັດ ດາວເຮືອງ ຈຳກັດ 50 ລ້ານກີບ, ກຸ່ມບໍລິສັດຄຳໄພຊະນະກໍ່ສ້າງ 50 ລ້ານກີບ, ບໍລິສັດຈິດຈະເລີນ 50 ລ້ານກີບ ,ບໍລິສັດເບຍລາວ25ລ້ານກີບ, ບໍລິສັດໄຟຟ້າລາວ 20 ລ້ານກີບ ແລະ ບໍລິສັດຕ່າງໆລວມມູນຄ່າ 224 ກວ່າລ້ານກີບ ມອບໂດຍຕາງຫນ້າແຕ່ລະພາກສ່ວນເຊິ່ງໃຫ້ກຽດຮັບຂອງທ່ານ ສຈ.ດຣ. ບໍ່ແສງຄຳ ວົງດາລາ ລັດຖະ ມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.
ຂະນະທີ່ທ່ານລັດຖະມົນຕີວ່າການກະຊວງ ຖວທ ຍັງໄດ້ແຈ້ງມາຍັງອົງການຈັດຕັ້ງທັງພາກລັດ ແລະ ເອກະຊົນ ຕະຫລອດຮອດພະນັກງານ, ທະຫານ, ຕຳຫລວດ, ພໍ່ແມ່ປະຊາຊົນ, ນັກທຸລະກິດໃນທົ່ວປະເທດໃຫ້ການອຸປະຖຳ ແລະ ເພື່ອເຂົ້າຮ່ວມຢ່າງກວ້າງຂວາງສາມາດຮັບລົງທະບຽນເລີ່ມແຕ່ວັນທີ 20 ທັນວາ 2013 ຮອດວັນທີ 5 ມັງກອນ 2014 ທີ່ສຳນັກງານຕຶກອົງການທ່ອງທ່ຽວແຫ່ງຊາດເກົ່າຕັ້ງຢູ່ຖະຫນົນ ລ້ານຊ້າງໃກ້ກັບທະນາຄານລາວŒ-ຫວຽດນາມ.
ສຳລັບທ່ານທີ່ມີພາຫະນະສ່ວນຕົວລົງທະບຽນທີ່ກົມໂຄສະນາການ ທ່ອງທ່ຽວ: ໂທ/ແຟັກ 021 212248, 020 55649105, 020 55910156, ສຳລັບທ່ານທີ່ບໍ່ມີພາຫະນະລົງທະບຽນທີ່ສະມາຄົມທຸລະກິດທ່ອງ ທ່ຽວລາວໂທ 021 243501, ແຟັກ: 021 243502, 020 55516943, 020 55516171.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ