 |
| ຮູບ : ປະກອບ |
ຂປລ. ພິທີປະກາດກຸ່ມບ້ານຊຽງຄູນ ເມືອງແອດ
ແຂວງຫົວພັນ ເປັນກຸ່ມບ້ານວັດທະນະທຳກຸ່ມທຳອິດຂອງເມືອງເປັນກຸ່ມທີ
3 ຂອງແຂວງ ໄດ້ຈັດຂຶ້ນໃນວັນທີ 14 ເດືອນມັງກອນ ປີ 2014 ນີ້,
ເຂົ້າຮ່ວມ ພິທີມີທ່ານ ຕົງລີເຕັ່ງ ເຈົ້າເມືອງໆແອດ, ມີຮອງຫົວໜ້າ
ພະແນກຖະແຫລງຂ່າວ - ວັດທະນະທຳ ແລະ ທ່ອງ ທ່ຽວແຂວງ,
ບັນດາທ່ານການນຳຂັ້ນເມືອງ ພ້ອມດ້ວຍ ອຳນາດການປົກຄອງບ້ານ,
ພໍ່ແມ່ປະຊາຊົນ, ນັກຮຽນເຂົ້າຮ່ວມຢ່າງພ້ອມພຽງ.
ກຸ່ມ
ບ້ານຊຽງຄູນ ປະກອບມີ 6 ບ້ານຄື: ບ້ານແທ່ນລວງ, ບ້ານຊຽງຄູນ,
ບ້ານນາປາ, ບ້ານກາງຊຽງຄູນ, ບ້ານແຜ້ ແລະ ບ້ານສໍ. ໃນ 6 ບ້ານມີ
352 ຫລັງຄາເຮືອນມີ 356 ຄອບຄົວ ມີພົນລະເມືອງ 2.011 ຄົນຍິງ 997
ຄົນມີ 4 ຊົນເຜົ່າຢູ່ຮ່ວມກັນຄື: ເຜົ່າລາວລຸ່ມ, ເຜົ່າໄຕດຳ,
ເຜົ່າກຶມມຸ ແລະ ເຜົ່າມົ້ງ. ຮີດຄອງປະເພນີ ແມ່ນນັບຖືສາສະໜາພຸດ
ແລະ ຜີ. ທົ່ວກຸ່ມບ້ານປະກອບມີ 6 ໜ່ວຍພັກ,
ໄດ້ຮັບໃບຢັ້ງຢືນເປັນໜ່ວຍພັກແຂງຮູ້ນຳພາຮອບດ້ານມີ 5 ໜ່ວຍພັກ
ແລະ ໃບຢັ້ງຢືນເປັນຄອບຄົວວັດທະນະທຳ 300 ຄອບຄົວ. ນອກຈາກນີ້
ໃນແຕ່ລະບ້ານມີບັນດາອົງການຈັດຕັ້ງຕ່າງໆເຄື່ອນໄຫວຖືກຕ້ອງຕາມ
ພາລະບົດບາດຂອງຕົນຢ່າງເປັນປົກກະຕິ.
ໃນ
ໄລຍະຜ່ານມາ
ອາຊີບຂອງປະຊາຊົນໃນທົ່ວກຸ່ມບ້ານໄດ້ຢຶດຖືເອົາການເຮັດນາປູກເຂົ້າ
ໃນ 2 ລະດູ, ມີເນື້ອທີ່ນາທັງໝົດ 131 ເຮັກຕາ, ສະມັດຕະພາບ
ການຜະລິດເຂົ້າໄດ້ 1.186 ໂຕນ,
ສະເລ່ຍໃສ່ພົນລະເມືອງຜູ້ໜຶ່ງໄດ້ຮັບເຂົ້າເປືອກ 590
ກິໂລຕໍ່ຄົນຕໍ່ປີ. ນອກຈາກການປູກເຂົ້າແລ້ວປະຊາຊົນ ຍັງໄດ້
ສຸມໃສ່ການປູກພືດເປັນສິນຄ້າ, ຫັດຖະກຳຫຍິບແສ່ວ, ລ້ຽງສັດ ແລະ ອື່ນໆ.
ເຊິ່ງໄດ້ສະແດງອອກມີຄອບຄົວຕົວແບບໃນການປູກພືດເປັນສິນຄ້າ 3 ຄອບ
ຄົວ, ຄອບຄົວຍົກສະມັດຕະພາບເຂົ້ານາມີ 3 ຄອບຄົວ,
ຄອບຄົວຫັດຖະກຳຫຍິບແສ່ວ 2 ຄອບຄົວ,
ລວມຍອດຜະລິດຕະພັນທົ່ວກຸ່ມບ້ານໄດ້ເກືອບ 6 ຕື້ກີບ, ສະເລ່ຍໄດ້ເກືອບ 3
ລ້ານກີບຕໍ່ຄົນຕໍ່ປີ. ນອກຈາກນີ້ພາຍໃນກຸ່ມບ້ານຊຽງຄູນ ແລະ
ສາມກຸ່ມບ້ານອ້ອມຂ້າງຍັງມີເງິນທ້ອນຂັ້ນບ້ານ 400 ກວ່າລ້ານ ກີບ
ໄດ້ເຮັດໃຫ້ຫລາຍຄອບຄົວ ມີການພັດທະນາຂຶ້ນເທື່ອລະກ້າວ.
ສາມາດຫລຸດພົ້ນຈາກຄວາມທຸກຍາກ. ດ້ານວັດທະນະທຳ, ສັງຄົມ, ເດັກເກນອາຍຸ
ໄດ້ເຂົ້າໂຮງຮຽນ 100%, ກຸ່ມບ້ານມີສຸກສາລາ ແລະ ຕູ້ຢາປະຈຳບ້ານ,
ໃນຄົວເຮືອນໄດ້ມີເຄື່ອງໃຊ້ສອຍ ເຮັດໃຫ້ຊີວິດຂອງພໍ່ແມ່ປະຊາຊົນ
ພາຍໃນ ກຸ່ມບ້ານມີຄວາມສະຫງົບ, ມີຄວາມສາມັກຄີ
ພ້ອມຈະສືບຕໍ່ສ້າງສາພັດທະນາເສດຖະກິດຄອບຄົວໃຫ້ນັບມື້ດີຂຶ້ນ.
ແຫລ່ງຂ່າວຈາກ: ສຳນັກຂ່າວສານປະເທດລາວ