 |
| ຮູບປະກອບ |
ເງິນເດືອນກາຍເປັນບັນຫາຮ້ອນ ແລະ
ຄ້າງຄາໃຈຂອງພະນັກງານລັດຖະກອນມາຫລາຍເດືອນ
ໂດຍສະເພາະພາຍຫລັງທີ່ຮ່ວງເງິນອຸດຫນູນ 760.000 ກີບຖືກຕັດໄປ,
ເບື້ອງລັດຖະບານຂໍລັດຖະກອນອົດທົນຜ່ານຜ່າຄວາມຫຍຸ້ງຍາກປະຈຸບັນ
ກຳລັງຄົ້ນຄວ້າເຊື່ອວ່າ ການປັບປຸງເງິນເດືອນໃນແຜນໃຫມ່
ຕ້ອງມີລັກສະນະຕັ້ງຫນ້າ.
ຈາກຄວາມພະຍາຍາມຂອງພັກ-ລັດຖະບານໃນການປັບປຸງເງິນເດືອນ,
ເພີ່ມຄ່າຄອງຊີບຫລາຍຄັ້ງ
ເພື່ອແກ້ໄຂຊີວິດການເປັນຢູ່ຂອງພະນັກງານ-ລັດຖະກອນມາຮອດຕົ້ນສົກ
ງົບປະມານຜ່ານມາ ລັດຖະບານກໍ່ໄດ້ເພີ່ມດັດຊະນີເງິນເດືອນ ແລະ
ໃຫ້ນະໂຍບາຍອຸດຫນູນພະນັກງານ-ລັດຖະກອນ 760.000
ກີບຕໍ່ຄົນຕໍ່ເດືອນ
ເຊິ່ງໄດ້ສ້າງຄວາມເພິ່ງພໍໃຈບໍ່ຫນ້ອຍແກ່ຜູ້ໄດ້ຮັບນະໂຍບາຍ
ດັ່ງກ່າວ ແຕ່ຜ່ານການປະຕິບັດຕົວຈິງໃນຫນຶ່ງປີຜ່ານມາ
ເຫັນວ່າມີຂໍ້ຫຍຸ້ງຍາກເພາະຕ້ອງໃຊ້ງົບປະມານຈຳນວນຫລາຍລັດບໍ່ມີ
ງົບພຽງພໍ
ຈິ່ງຈຳເປັນໄດ້ຢຸດປະຕິບັດຮ່ວງເງິນອຸດຫນູນດັ່ງກ່າວນັ້ນໄວ້
ກ່ອນ ແລະ ຫລັງຈາກນັ້ນໄດ້ມີຫາງສຽງກັບຄຳຖາມ ຕາມມາຢ່າງຫລວງຫລາຍ.
ຢ່າງໃດກໍ່ຕາມ ທັງຫມົດທັງມວນຂອງບັນດາຄຳຖາມ ທ່ານ ທອງສິງ
ທຳມະວົງ ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ຄຳຕອບວ່າ:
ເງິນເດືອນ, ເງິນອຸດຫນູນ ແລະ
ເງິນນະໂຍບາຍຕ່າງໆແມ່ນຫນຶ່ງໃນນະໂຍບາຍສຳຄັນຂອງພັກ-ລັດເຮົາ,
ສ່ອງແສງໃຫ້ເຫັນເຖິງຄ່າຕອບແທນໃຫ້ພະນັກງານ-ລັດຖະກອນ,
ທະຫານຕຳຫລວດ,
ພະນັກງານບຳນານທີ່ໄດ້ປະກອບສ່ວນເຂົ້າໃນການປະຕິບັດຫນ້າທີ່
ທີ່ທາງການມອບຫມາຍໃຫ້, ນະໂຍບາຍເຫລົ່ານັ້ນ
ແມ່ນແນໃສ່ຮັບປະກັນໃຫ້ການດຳລົງຊີວິດ ແລະ
ການເຄື່ອນໄຫວວຽກຂອງພະນັກງານປະຈຳການ ແລະ
ບໍ່ປະຈຳການດຳເນີນໄປດ້ວຍດີ.
ສ່ວນສົກ 2013-2014 ນີ້ ຍັງຕ້ອງໄດ້ຮັກສາຮ່ວງເງິນເດືອນ 8.800
ຕື້ກີບ ທີ່ສະພາແຫ່ງຊາດຮັບຮອງໄວ້ຄືເກົ່າ, ຮັກສາຊັ້ນ ແລະ
ເງິນເດືອນໄວ້, ແຕ່ເພີ່ມເງິນເດືອນຕື່ມ 6.700 ກີບຕໍ່ດັດຊະນີ.
ເພື່ອເປັນກົນໄກໃນການຄົ້ນຄວ້າປັບ ປຸງເງິນເດືອນໃຫມ່
ລັດຖະບານໄດ້ສ້າງຕັ້ງຄະນະຮັບຜິດຊອບລະດັບຊາດຄົ້ນຄວ້າໂດຍເລີ່ມ
ແຕ່ໄຕມາດ 2 ຂອງສົກງົບປະມານນີ້ເປັນຕົ້ນໄປ
ຫລັງຈາກນັ້ນຈິ່ງນຳໄປຜ່ານກອງປະຊຸມລັດຖະບານ ແລະ
ສະເຫນີໃຫ້ສູນກາງພັກ, ສະພາແຫ່ງຊາດພິຈາລະນາໃນຂັ້ນຕໍ່ໄປ.
ແນວໃດກໍ່ດີ ທ່ານນາຍົກລັດຖະມົນຕີ ກ່າວວ່າ:
ທິດທາງການປັບປຸງເງິນເດືອນໃນໄລຍະຍາວສຳລັບແຜນການ 5 ປີ ຄັ້ງທີ 8
ແມ່ນຈະໄດ້ຄົ້ນຄວ້າໃຫ້ມີລັກສະນະຕັ້ງຫນ້າ, ຄົບຊຸດ ແລະ
ມີວິທະຍາສາດ.
ສຳລັບໄລຍະນີ້
ຂໍໃຫ້ພະນັກງານລັດຖະກອນທຸກຖ້ວນຫນ້າຈົ່ງເຫັນອົກເຫັນໃຈ ແລະ
ເຂົ້າໃຈໃນຄວາມຈຳເປັນຂອງລັດຖະບານ
ພ້ອມກັນຜ່ານຜ່າຄວາມຫຍຸ້ງຍາກນີ້ໄປໃຫ້ໄດ້ ແລະ ແນ່ນອນວ່າ
ພວກເຮົາຈະມີທາງອອກທີ່ດີຕໍ່ໄປໄດ້, ທ່ານ ທອງສິງ ທຳມະວົງ ກ່າວ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ