ວັນທີ 6 ມັງກອນ 2014 ທ່ານ ດຣ. ບຸນທອງ ຈິດມະນີ ປະທານກວດກາສູນກາງພັກ, ຫົວຫນ້າອົງການກວດກາລັດ, ຫົວຫນ້າຕ້ານການສໍ້ລາດບັງຫລວງ ພ້ອມຄະນະ ໄດ້ເຄື່ອນໄຫວຢ້ຽມຢາມເຮັດວຽກຢູ່ແຂວງ ຫົວພັນ.
ການມາຢ້ຽມຢາມເຮັດວຽກຄັ້ງນີ້ ໄດ້ຮັບຟັງການລາຍງານສະພາບການເຄື່ອນໄຫວປະຕິບັດວຽກງານກວດກາພັກŒກວດກາລັດໃນໄລຍະຜ່ານມາທົ່ວແຂວງຫົວພັນມີ 887 ຫນ່ວຍພັກ, ທຽບໃສ່ປີ 2012 ເພີ່ມຂຶ້ນ 100 ຫນ່ວຍ, ມີຫນ່ວຍພັກເຂັ້ມແຂງຮູ້ນຳພາຮອບດ້ານ ແລະ ຫນ່ວຍພັກແຂງ 338 ຫນ່ວຍ, ເພີ່ມຂຶ້ນ 38 ຫນ່ວຍ, ຫນ່ວຍພັກກາງ 130 ຫນ່ວຍ, ອ່ອນ 5 ຫນ່ວຍ ແລະ ບໍ່ໄດ້ຈັດແບ່ງປະເພດຈຳນວນຫນຶ່ງ, ມີສະມາຊິກພັກທັງຫມົດ 12.312 ສະຫາຍ ທຽບໃສ່ປີ 2012 ເຫັນວ່າເພີ່ມຂຶ້ນ 821 ສະຫາຍ; ມີສະມາຊິກພັກແຂງຮູ້ນຳພາຮອບດ້ານ ແລະ ແຂງ 8.998 ສະຫາຍ, ກາງ 1.141 ສະຫາຍ, ອ່ອນ 69 ສະຫາຍ, ເສຍທາດ 50 ສະຫາຍ.
ການປະຕິບັດວຽກງານກວດກາພັກŒກວດກາລັດໄດ້ເອົາໃຈໃສ່ປະຕິບັດແຜນພັດທະນາເສດຖະກິດŒສັງຄົມຂອງແຂວງ, ກວດກາບັນດາໂຄງການພື້ນຖານໂຄງລ່າງ, ການຂຸດຄົ້ນແຮ່ທາດ, ການເກັບທ້ອນໄມ້ຕົກຄ້າງ, ການຄຸ້ມຄອງລາຍຮັບລາຍຈ່າຍດ້ານງົບປະມານ ແລະ ວຽກງານອື່ນໆ.
ຜ່ານການກວດກາເຫັນໄດ້ບັນດາພະແນກການ, ອົງການກ່ຽວຂ້ອງຂອງແຂວງ ແລະ ຂັ້ນເມືອງໄດ້ເອົາໃຈໃສ່ປະຕິບັດຕາມລະບຽບກົດຫມາຍ, ຕາມການອະນຸມັດຂອງຂັ້ນເທິງເປັນຢ່າງດີ, ບັນດາໂຄງການກໍ່ສ້າງພື້ນຖານໂຄງລ່າງສ່ວນຫລາຍປະຕິບັດໄດ້ສຳເລັດເຮັດໃຫ້ແຂວງຫົວພັນມີລັກສະນະກ້າວກະໂດດເມື່ອທຽບໃສ່ປີຜ່ານມາ.
ຈາກຈຸດດີຍັງມີປາກົດການຫຍໍ້ທໍ້ທີ່ ເປັນການສໍ້ລາດບັງຫລວງເກີດຂຶ້ນໃນຖັນແຖວພະນັກງານທີ່ສໍ້ໂກງເງິນຂອງລັດ ເຊິ່ງມີຜູ້ຕ້ອງຫາທັງຫມົດ 61 ຄົນ, ພົບເງິນເສຍຫາຍ 20 ກວ່າຕື້ກີບ ແລະ 376.000 ພັນໂດລາ ແລະ ສາມາດເກັບເງິນຄືນມາໄດ້ພຽງແຕ່ 9 ຕື້ກີບ. ໃນນີ້ ຍັງໄດ້ສັ່ງຟ້ອງສານຕັດສິນ 20 ຄົນ, ລົງວິໄນບໍລິຫານ, ປົດຊັ້ນ, ໂຈະການເລື່ອນຊັ້ນŒເລື່ອນຂັ້ນ, ກ່າວເຕື່ອນ 41 ຄົນ.
ໂອກາດມາຢ້ຽມຢາມ ແລະ ເຮັດວຽກຄັ້ງນີ້ທ່ານ ດຣ. ບຸນທອງ ຈິດມະນີ ໄດ້ມີຄຳໂອລົມເຊິ່ງທ່ານໄດ້ເນັ້ນຫນັກໃຫ້ຄະນະພັກອຳນາດການປົກຄອງນັບແຕ່ຂັ້ນແຂວງລົງຮອດທ້ອງຖິ່ນຕ້ອງເພີ່ມທະວີຄວາມສາມັກຄີ, ສ້າງຖັນແຖວພະນັກງານກວດກາໃຫ້ມີຄວາມເຂັ້ມແຂງຫນັກແຫນ້ນເພື່ອເຮັດໃຫ້ການຈັດຕັ້ງປະຕິບັດວຽກງານມີຄວາມສອດຄ່ອງສະດວກເພາະວຽກງານກວດກາເປັນວຽກງານສຳຄັນທີ່ຕ້ອງໄດ້ເຮັດເປັນປົກກະຕິໃນການກວດກາ ເພື່ອຄວາມຖືກຕ້ອງປອດໃສໃນຖັນແຖວພະນັກງານສະມາຊິກພັກ, ພະນັກງານລັດຖະກອນ ແລະ ສິ່ງສຳຄັນຄືເຮັດຫນ້າທີ່ປົກປ້ອງສິດຜົນປະໂຫຍດລວມຂອງຊາດ, ປະຊາຊົນ ເພື່ອຕ້ານການຖືກສໍ້ໂກ້ງ.
ເຂົ້າຮ່ວມຮັບຟັງຄັ້ງນີ້ມີການນຳແຂວງ, ຜູ້ເຮັດວຽກງານກວດກາພັກŒກວດກາລັດ, ອົງການທຽບເທົ່າ, ເມືອງ ຊຳເຫນືອເຂົ້າຮ່ວມ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ