 |
| ຮູບ: ປະກອບ |
ວັນທີ 23 ກຸມພານີ້
ແຂວງຫົວພັນ
ຮ່ວມກັບບໍລິສັດຜູ້ຮັບເໝົາກໍ່ສ້າງໄດ້ຈັດພິທີລົງນາມສັນຍາ
ກໍ່ສ້າງໂຄງການປັບປຸງທາງຫຼວງແຫ່ງຊາດຄື: ເສັ້ນທາງເລກ 6A ແລະ 6B.
ຊຶ່ງຈຸດເລີ່ມຕົ້ນໂຄງການທາງເລກ
6A ແມ່ນເລີ່ມຈາກ 3 ແຍກບ້ານຫ້າງລ້ອງ ເມືອງວຽງໄຊ
ໄປເຖິງຈຸດເທສະບານເມືອງສົບເບົາມີຄວາມຍາວທັງໝົດ 60,2 ກິໂລແມັດ,
ປະກອບມີຂົວເບຕົງເສີມເຫຼັກຕາມສາຍທາງ 4 ແຫ່ງ ມີຄວາມຍາວຂອງຂົວ
117,4 ແມັດ ໂດຍແມ່ນບໍລິສັດລັດວິສາຫະກິດກໍ່ສ້າງຂົວທາງເລກ 8
ຮ່ວມກັບບໍລິສັດ CEI18 ສສ ຫວຽດນາມເປັນຜູ້ຮັບເໝົາກໍ່ສ້າງ.
ສ່ວນໂຄງການປັບປຸງທາງຫຼວງແຫ່ງຊາດເລກ 6B
ຈຸດເລີ່ມຕົ້ນແຕ່ເທສະບານເມືອງສົບເບົາເຖິງຈຸດທ້າຍຂອງໂຄງການທີ່
ບ້ານປ່າຮ່າງຕິດກັບຊາຍແດນຫວຽດນາມມີຄວາມຍາວທັງໝົດ 26,1
ກິໂລແມັດ, ມີຂົວເບຕົງເສີມເຫຼັກຕາມສາຍທາງ 2 ແຫ່ງ ແລະ
ຂົວຂ້າມນ້ໍາມ່າ 1 ແຫ່ງ ເປັນຂົວປະສົມມີຄວາມຍາວຂອງຂົວທັງໝົດ 263
ແມັດ ບໍລິສັດຊົງເມ ສປ ຈີນ ເປັນຜູ້ຮັບເໝົາກໍ່ສ້າງ.
ທັງສອງໂຄງການນີ້ແມ່ນບໍລິສັດອິນສານຮ່ວມກັບບໍລິສັດແອວເຕັກ
ເປັນຜູ້ຮັບຜິດຊອບທາງດ້ານເຕັກນິກ ແລະ ໄດ້ນໍາໃຊ້ທຶນກໍ່ສ້າງທັງໝົດ
42,3 ລ້ານໂດສະຫະລັດ,
ໃນນັ້ນທຶນຊ່ວຍເຫຼືອລ້າຈາກທະນາຄານພັດທະນາອາຊີ 20 ລ້ານໂດ
ລາສະຫະລັດ, ທຶນສົມທົບຂອງລັດຖະບານ ສປປ ລາວ 10,3 ລ້ານໂດລາສະຫະລັດ
ແລະ ທຶນປັບປຸງເສັ້ນທາງຫຼວງແຫ່ງຊາດສອງເສັ້ນດັ່ງກ່າວມີ 23,9
ລ້ານໂດລາສະຫະລັດ. ຄາດວ່າໂຄງການທາງເລກ 6A ການກໍ່ສ້າງແມ່ນ 36
ເດືອນ ແລະ ຈະໃຫ້ສໍາເລັດໃນທ້າຍປີ 2017, ເສັ້ນທາງເລກ 6B
ຈະໃຊ້ເວລາກໍ່ສ້າງ 24 ເດືອນ ແລະ ຈະໃຫ້ສໍາເລັດໃນທ້າຍປີ 2016.
ຮ່ວມລົງນາມບົດບັນທຶກສັນຍາກໍ່ສ້າງແມ່ນ ທ່ານ ສຸກສາຄອນ
ສຸຕັນນຸວົງ ຫົວໜ້າໂຄງການທາງເລກ 6A ແລະ ທ່ານ ດາວອນ
ວົງລໍຄໍາຫົວໜ້າໂຄງການທາງເລກ 6B ໃນນາມເຈົ້າຂອງ ໂຄງການ ແລະ
ຜູ້ຕາງໜ້າສອງບໍລິສັດຮັບເໝົາກໍ່ສ້າງ.
ໂດຍການເຂົ້າຮ່ວມເປັນສັນຂີພິຍານຂອງ ທ່ານ ສຈ.ດຣ. ພັນດວງຈິດ ວົງສາ
ປະທານສູນກາງແນວລາວສ້າງຊາດ, ທ່ານ ຄໍາຮຸ່ງ ເຮືອງວົງສີ
ເຈົ້າແຂວງໆຫົວພັນ ພ້ອມດ້ວຍແຂກຖືກເຊີນ ແລະ
ວິຊາການທັງສອງຝ່າຍເຂົ້າຮ່ວມ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ