 |
| ຮູບ: ກຳລັງກໍ່ສ້າງຂົວ |
ການປັບປຸງເສັ້ນທາງມີຄວາມຍາວ 62 ກິໂລແມັດ
ເລີ່ມແຕ່ເມືອງສົບເບົາເຖິງຈຸດສຸດທ້າຍຂອງໂຄງການທີ່ບ້ານດ່ານ
ເມືອງແອດ ແຂວງຫົວພັນ ນັບຈາກປະຕິບັດວຽກມາແຕ່ກາງປີ 2011
ໄດ້ສຳເລັດແລ້ວພ້ອມສາມາດເປີດບໍລິການນຳໃຊ້ໄດ້ນັບແຕ່ທ້າຍປີ
2013 ເປັນຕົ້ນມາ ຂະນະທີ່ປະຈຸບັນກຳລັງຂຸ້ນຂ້ຽວກໍ່ສ້າງຂົວ 7
ແຫ່ງທີ່ນອນຢູ່ເສັ້ນທາງດັ່ງກ່າວ.
ບໍ່ດົນມານີ້ ທ່ານ ອາດນາດາ ບູລົມ
ຫົວໜ້າໂຄງການລາຍງານໃຫ້ທີມງານຂ່າວເສດຖະກິດ-ສັງຄົມຮູ້ວ່າ:
ໂຄງການປັບປຸງທາງ 6A ສົບເບົາ-ບ້ານດ່ານ
ຊຶ່ງເປັນໂຄງການເຊື່ອມຕໍ່ເສດຖະກິດພາກເໜືອຂອງແຂວງຫົວພັນແຍກ
ອອກຈາກທາງເລກ 6 ສາມແຍກບ້ານຫາງລ້ອງ ເມືອງວຽງໄຊ ກິໂລແມັດ 0+000
ຜ່ານສີ່ຕົວເມືອງມີ: ເມືອງວຽງໄຊ, ເມືອງສົບເບົາ, ເມືອງຊຽງຄໍ້ ແລະ
ເມືອງແອດ ບ້ານດ່ານ ແລ້ວອອກສູ່ ສສ ຫວຽດນາມ ແມ່ນສຳເລັດໂດຍພື້ນຖານ.
ສຳລັບໂຄງການນີ້ໃຊ້ໄລຍະເວລາໃນການກໍ່ສ້າງລວມ 30 ເດືອນ
ເລີ່ມຕົ້ນປະຕິບັດວຽກແຕ່ວັນທີ 11 ພຶດ ສະພາ 2011 ແລະ
ໄດ້ສຳເລັດການກໍ່ສ້າງໃນເດືອນພະຈິກ 2013 ຜ່ານມານີ້,
ຄວາມຍາວຂອງທາງທັງໝົດ 62 ກິໂລແມັດ
ເລີ່ມແຕ່ຕົວເມືອງສົບເບົາຈົນຮອດ ບ້ານດ່ານ ເມືອງແອດ ແຂວງຫົວພັນ.
ທ່ານ ອາດນາດາ ບູລົມ ໃຫ້ຮູ້ອີກວ່າ:
ໂຄງການນີ້ໄດ້ຮັບການຊ່ວຍເຫຼືອລ້າຈາກທະນາຄານໂລກ 70% ແລະ
ທຶນສົມທົບຂອງລັດຖະບານ 30%,
ຊຶ່ງໄດ້ເຊັນສັນຍາກັບບໍລິສັດຮັບເໝົາກໍ່ສ້າງເປັນເງິນຈຳນວນ
6,75 ລ້ານກວ່າໂດລາສະຫະລັດ.
ແນວໃດກໍ່ດີ ການກໍ່ສ້າງຂົວ 7 ແຫ່ງ
ທີ່ນອນໃນໂຄງການດຽວກັນ ທ່ານ ອາດນາດາ ບູລົມ ໃຫ້ຮູ້ອີກວ່າ:
ແມ່ນໄດ້ເລີ່ມລົງມືມາແຕ່ທ້າຍເດືອນເມສາ 2013 ແລະ
ໃຫ້ສຳເລັດໃນທ້າຍເດືອນດຽວກັນຂອງປີ 2015
ຈະໃຊ້ທຶນໃນການກໍ່ສ້າງມູນຄ່າ 5,30 ລ້ານກວ່າໂດລາສະຫະລັດ
ທີ່ປະກອບມີ: ຂົວນ້ຳລ້ອງ, ຂົວຫົວກະສາຍ, ຂົວຫ້ວຍຮວງ, ຂົວຫ້ວຍມອນ,
ຂົວຫ້ວຍນ້ຳດິກ, ຂົວຫ້ວຍຢອງ ແລະ ຂົວນ້ຳມ້າ
ມາຮອດປະຈຸບັນນີ້ຄວາມຄືບໜ້າຂອງວຽກງານປະຕິບັດໄດ້ 12%.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ