 |
| ນ້ຳຕົກຕາດສະເຫຼີຍ |
ນ້ຳຕົກຕາດແຫ່ງນີ້ ເອີ້ນໄດ້ວ່າເປັນສະຖານທີ່ທ່ອງທ່ຽວທີ່ທຳມະຊາດຈົງໃຈປັ້ນແຕ່ງ ຂຶ້ນມາເພື່ອສ້າງສິ່ງສຳລານໃຈໃຫ້ນັກທ່ອງທ່ຽວໄດ້ເຫັນໄດ້ຊົມກັນ ຊຶ່ງໃນແຕ່ລະປີມີນັກທ່ອງທ່ຽວທັງ ພາຍໃນ ແລະ ຕ່າງປະເທດເຂົ້າມາທ່ຽວຊົມເປັນຈຳນວນຫຼວງຫຼາຍ ໂດຍສ່ວນໃຫຍ່ແລ້ວໃນວັນເທສະການຕ່າງໆຈະມີນັກທ່ອງທ່ຽວພາຍໃນໄປ ເຮັດກິດຈະກຳທີ່ຫຼາກຫຼາຍພາຍໃນຕາດເປັນຕົ້ນ: ຫຼິ້ນນ້ຳ, ປູສາດກິນເຂົ້າ ແລະ ອື່ນໆ ທ່າມກາງບັນຍາກາດອັນບໍລິສຸດ ແລະ ຄວາມງຽບສະຫງົບອັນເໝາະສົມເປັນທີ່ສຸດສຳລັບການພັກຜ່ອນຢ່ອນອາລົມ ໃນຫຼາຍຮູບແບບ, ສ່ວນເສັ້ນທາງໄປຕາດດັ່ງ ກ່າວກໍສາມາດເຂົ້າເຖິງໄດ້ສະດວກສະບາຍ, ມີຫ້ອງນ້ຳ ແລະ ມີຮ້ານອາຫານໄວ້ຄອຍຮອງຮັບບັນດານັກທ່ອງທ່ຽວທີ່ເດີນທາງມາທ່ຽວ ຊົມນຳອີກ.
ນອກນັ້ນ ນ້ຳຕົກຕາດແຫ່ງນີ້ຍັງມີຂົວອູ່ຢູ່ຕີນນ້ຳຕົກຊຶ່ງເປັນອີກບ່ອນໜຶ່ງ ທີ່ນັກທ່ອງທ່ຽວສາມາດໄຕ່ຂ້າມຫາອີກຝາກໜຶ່ງຂອງຕາດ ແລະ ຍັງເປັນບ່ອນທີ່ນັກທ່ອງທ່ຽວມັກໃຊ້ເປັນສະຖານທີ່ຖ່າຍຮູບເພາະຈະ ສາມາດເກັບພາບຂອງຕາດໄດ້ຢ່າງສວຍງາມ, ບໍ່ພໍເທົ່ານັ້ນບໍລິເວນຫົວຕາດຍັງສາມາດຍ່າງຂ້າມໄປມາໄດ້.
ນ້ຳຕົກຕາດສະເຫຼີຍຕັ້ງຢູ່ແຄມເສັ້ນທາງເລກ 6 ລະຫວ່າງບ້ານສະເຫຼີຍ ແລະ ບ້ານໂພນໄຊ, ຫ່າງຈາກເທສະບານແຂວງຫົວ ພັນ 36 ກິໂລແມັດ, ເປັນນ້ຳຕົກຕາດທີ່ມີລັກສະນະບໍ່ສູງປານໃດແຕ່ມີຄວາມຍາວປະມານ 100 ກວ່າແມັດ, ບ່ອນກວ້າງສຸດປະ ມານ 10 ແມັດ ນັກທ່ອງທ່ຽວທ່ານໃດທີ່ບໍ່ທັນໄດ້ໄປ ຫຼື ໄປແລ້ວຢາກໄປອີກກໍສາມາດໄປໄດ້ເພາະຕາດດັ່ງກ່າວມີນ້ຳຕົກຕະຫຼອດ ທັງລະດູແລ້ງ ແລະ ລະດູຝົນ.
ທີ່ມາ: ໜັງສືພີມເສດຖະກິດ-ສັງຄົມ