ໂຄງການກໍ່ສ້າງສະໜາມບິນໜອງຄ້າງທີ່ລົງທຶນເຖິງ 592
ຕື້ກວ່າກີບ ຄາດຄະເນວ່າຈະໃຫ້ສຳເລັດ ແລະ
ເປີດການນຳໃຊ້ໃນລະຫວ່າງກາງປີໜ້າຂະນະທີ່ເວລານີ້ວຽກກໍ່ສ້າງ
ໂດຍລວມ ໂຄງການຄືບໜ້າພຽງ 10%.
ເມື່ອວັນທີ 17 ເມສາຜ່ານມາ ທ່ານ ທອງສິງ ທຳມະວົງ
ນາຍົກລັດຖະມົນຕີ
ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມສະໜາມບິນໜອງຄ້າງຢູ່ເມືອງ
ຊຳເໜືອ ແຂວງຫົວພັນ, ໂດຍໄດ້ຮັບການຕ້ອນຮັບຈາກ ທ່ານ ຄຳຮຸ່ງ
ເຮືອງວົງສີ ເຈົ້າແຂວງໆຫົວພັນ ພ້ອມດ້ວຍບັນດາຫົວໜ້າພະແນກ,
ຮອງຫົວໜ້າພະແນກຂະແໜງການຕ່າງໆທີ່ກ່ຽວຂ້ອງພາຍໃນແຂວງຢ່າງ
ພ້ອມພຽງ.
ໃນການເຄື່ອນໄຫວຢ້ຽມຢາມຄັ້ງນີ້,
ທ່ານນາຍົກລັດຖະມົນຕີໄດ້ຮັບຟັງການລາຍງານຈຸດປະສົງຂອງການສ້າງ
ໂຄງການນີ້ໂດຍຫຍໍ້ຈາກທ່ານເຈົ້າແຂວງໆ ຫົວພັນວ່າ:
ໂຄງການນີ້ເປັນໂຄງການໜຶ່ງຂອງລັດຖະບານ ສປປ ລາວ
ທີ່ສ້າງຂຶ້ນມາເພື່ອຮອງຮັບ
ເຮືອບິນສາຍພາຍໃນ ແລະ
ຕ່າງປະເທດໃນອະນາຄົດພ້ອມທັງເພື່ອຊຸກຍູ້,
ສົ່ງເສີມການພັດທະນາເສດຖະກິດŒສັງຄົມ ແລະ
ການທ່ອງທ່ຽວຂອງແຂວງຫົວພັນກໍຄືໃນພາຍໃນປະເທດ
ໂດຍສະເພາະແມ່ນວຽກງານຂົນສົ່ງທາງອາກາດໃນໄລຍະຍາວ ແລະ
ທັງເປັນການຜັນຂະຫຍາຍເສດຖະກິດŒສັງຄົມຂອງ ສປປ ລາວ ແຕ່ປິ 2010Œ2020
ຕາມນະໂຍບາຍຂອງພັກŒລັດທີ່ຈະຫັນຈາກປະເທດບໍ່ມີຊາຍແດນຕິດກັບ
ທະເລມາເປັນບໍລິການທາງຜ່ານ ແລະ
ຄວາມມຸ່ງໝັ້ນການປົດປ່ອຍອອກຈາກສະພາບປະເທດດ້ອຍພັດທະນາໃນປີ
2020.
ພ້ອມນັ້ນ,
ຍັງໄດ້ຮັບລາຍງານຄວາມຄືບໜ້າຂອງໂຄງການກໍ່ສ້າງສະໜາມບິນໜອງຄ້າງ
ຈາກຄະນະຮັບຜິດຊອບກໍ່ສ້າງຂອງບໍລິສັດພັດທະນາກະສິກຳຮວ່າງແອງ
ອັດຕະປື ຈຳກັດ ໃນຖານະເປັນຜູ້ຮັບເໝົາວ່າ:
ໂຄງການນີ້ໄດ້ລົງກໍ່ສ້າງນັບແຕ່ວັນທີ 15 ມິຖຸນາ 2013 ເປັນຕົ້ນມາ
ໂດຍມີໜ້າວຽກທັງໝົດຄື: ເລນຂຶ້ນແລ່ນລົງຂະໜາດ 2.488x30 ແມັດ,
ທາງແວ່, ລານຈອດ, ອາຄານຜູ້ໂດຍສານສອງຊັ້ນ, ສະຖານີອຸຕຸນິຍົມ,
ວິທະຍຸຊ່ວຍການບິນ, ລະບົບນ້ຳ ແລະ ໄຟຟ້າ, ຮົ້ວອ້ອມ ແລະ ອື່ນໆ
ອີກຈຳນວນໜຶ່ງລວມມູນຄ່າກໍ່ສ້າງທັງໝົດ 74 ລ້ານໂດລາສະຫະລັດ
ຊຶ່ງມາຮອດປະຈຸບັນ
ໂຄງການດັ່ງກ່າວໄດ້ສ້າງສຳເລັດໄປແລ້ວ 10% ແລະ
ພວມເລັ່ງມືກໍ່ສ້າງຢ່າງເຄັ່ງຮ້ອນ
ໂດຍສະເພາະການຖົມໜ້າດິນຊຶ່ງດຳເນີນໄປຕາມມາດຕະຖານຂອງກົມການ
ບິນພົນລະເຮືອນ ແລະ ສາກົນວາງອອກຄາດວ່າຈະໃຫ້ສຳເລັດ ແລະ
ເປີດນຳໃຊ້ຢ່າງເປັນທາງການໃນວັນທີ 25 ມິຖຸນາ ປີ 2015.
ຖ້າຫາກໂຄງການນີ້ສຳເລັດຕາມແຜນການຈະສາມາດຮອງຮັບເຮືອບິນຂະໜາດ
70Œ100 ບ່ອນນັ່ງເຊັ່ນ: ATR 72, Fokker 70 ຫຼື ທຽບເທົ່າ.
ໃນໂອກາດດຽວກັນນີ້ ທ່ານ ທອງສິງ ທຳມະວົງ
ໃຫ້ທິດຊີ້ນຳບໍລິສັດພັດທະນາກະສິກຳຮວ່າງແອງອັດຈະປື ຈຳກັດ
ຈົ່ງເອົາໃຈໃສ່ໃນການກໍ່ສ້າງໜ້າວຽກຂອງສະໜາມບິນແຫ່ງນີ້ໃຫ້ໄດ້
ມາດຕະຖານຂອງກົມການບິນພົນລະເຮືອນວາງອອກ (MOS 2009) ແລະ
ມາດຖານສາກົນ (ICAO) ທັງນີ້
ກໍເພື່ອຮັບປະກັນໃຫ້ການນຳໃຊ້ສະໜາມບິນໜອງຄ້າງມີຄວາມປອດໄພ ແລະ
ສາມາດນຳໃຊ້ໄດ້ໃນໄລຍະຍາວຕໍ່ໄປ.
ແຫລ່ງຂ່າວຈາກ: ເສດຖະກິດ-ສັງຄົມ