ພະແນກແຜນການ ແລະ ການລົງທຶນ ແຂວງຫົວພັນ ເປີດເຜີຍຕໍ່ໜັງສືພິມ ເສດຖະກິດ-ສັງຄົມວ່າ: ໃນໄລຍະ 8 ເດືອນມານີ້ ແຂວງຫົວພັນ ໄດ້ເອົາໃຈໃສ່ຈັດຕັ້ງປະຕິບັດຕາມແຜນພັດ ທະນາເສດຖະກິດ-ສັງຄົມ ໂດຍສະເພາະວຽກການເກັບລາຍຮັບເຂົ້າງົບປະມານ ແລະ ຜ່ານການປະຕິບັດຕົວຈິງເຫັນວ່າ ແຂວງສາມາດເກັບລາຍຮັບເຂົ້າງົບປະມານໄດ້ທັງໝົດ 40,76 ຕື້ກີບ (ລວມທັງ ບ້ວງຂອງແຂວງ ແລະ ສູນກາງ) ທຽບໃສ່ແຜນການປີປະຕິບັດໄດ້ 53,24%, ສຳລັບລາຍຮັບພາຍໃນແຂວງໄດ້ 31,84 ຕື້ກີບ ເທົ່າກັບ 60,43% ຂອງແຜນການປີ ຊຶ່ງປະກອບມີລາຍຮັບຈາກສ່ວຍສາອາກອນຈຳນວນ 27,79 ຕື້ກີບ, ຮັບຈາກພູດພາສີແບ່ງປັນໃຫ້ ເມືອງສາມສ້າງປະຕິບັດໄດ້ 1,70 ຕື້ ກີບ ແລະ ຮັບຈາກຊັບສິນເປັນເງິນ 2,33 ຕື້ກີບ.
ສ່ວນດ້ານລາຍຈ່າຍ ແຂວງປະຕິບັດໄດ້ທັງໝົດ 268,11 ຕື້ກີບ ທຽບໃສ່ແຜນການປີປະຕິບັດໄດ້ 62,10% ໃນນັ້ນ ຈ່າຍເງິນເດືອນພື້ນຖານຈຳນວນ 178,30 ຕື້ກີບ, ຈ່າຍເງິນນະໂຍບາຍຊ່ວຍໜູນຕ່າງໆ ເປັນມູນຄ່າ
12,42 ຕື້ກີບ, ຈ່າຍຮັບໃຊ້ບໍລິຫານປົກກະຕິແມ່ນ 16,65 ຕື້ກີບ, ຈ່າຍດັດສົມ, ສົ່ງເສີມ ແລະ ບຳລຸງ ລວມແລ້ວປະມານ 7,55 ຕື້ກີບ, ຈ່າຍຊື້ຊັບສົມບັດຮັບໃຊ້ບໍລິຫານລັດມູນຄ່າ 3,35 ຕື້ກີບ, ຈ່າຍອື່ນໆອີກຈຳນວນ 1,40 ຕື້ກີບ ແລະ ຈ່າຍການລົງທຶນຂອງລັດສະເລ່ຍເປັນມູນຄ່າ 48,42 ຕື້ກີບ.
ເນື່ອງຈາກໄລຍະ 8 ເດືອນຜ່ານມາ ທົ່ວແຂວງຫົວພັນປະຕິບັດລາຍຮັບໄດ້ພຽງ 50 ກວ່າສ່ວນຮ້ອຍຂອງແຜນການ ຈິ່ງຕ້ອງໄດ້ສູ້ຊົນໃຫ້ໜັກຂຶ້ນເພື່ອເຮັດໃຫ້ການຈັດຕັ້ງປະຕິບັດແຜນການເກັບລາຍຮັບເຂົ້າງົບປະມານ ໃນໄລຍະ 4 ເດືອນທ້າຍສົກປີ ບັນລຸຕາມຄາດໝາຍ ໃນນັ້ນ ແຂວງສຸມໃສ່ປະຕິບັດນະໂຍບາຍປະຢັດມັດທະຫຍັດ, ສືບຕໍ່ກວດກາຕິດຕາມ ພ້ອມທັງສະກັດກັ້ນການສໍ້ລາດບັງຫຼວງທຸກຮູບການ ແລະ ປະຕິບັດວິໄນການເງິນໃຫ້ເຂັ້ມງວດ, ຄຽງຄູ່ກັນນັ້ນ ແຂວງຍັງຈະສູ້ຊົນໃນການເກັບ ລາຍຮັບເຂົ້າງົບປະມານໃຫ້ໄດ້ທັງໝົດ 22,75 ຕື້ກີບ, ສຳລັບລາຍຮັບພາຍໃນແຂວງແມ່ນ 12,01 ຕື້ກີບ, ໃນນີ້ ປະກອບມີລາຍຮັບຈາກສ່ວຍສາອາກອນໄດ້ 12,45 ຕື້ກີບ, ຮັບຈາກພູດພາສີແບ່ງປັນໃຫ້ເມືອງສາມສ້າງໃຫ້ໄດ້ 680 ລ້ານກີບ ແລະ ຮັບຈາກຊັບສິນ 5,88 ຕື້ກີບ.
ສ່ວນລາຍຈ່າຍງົບປະມານໃນ 4 ເດືອນທ້າຍປີແມ່ນບໍ່ໃຫ້ເກີນ 431,75 ຕື້ກີບ, ໃນນັ້ນ ຈ່າຍເງິນເດືອນພື້ນຖານຈຳນວນ 300,28 ຕື້ກີບ, ເງິນນະໂຍບາຍຊ່ວຍໜູນຕ່າງໆແມ່ນ 22,38 ຕື້ກີບ, ຈ່າຍຮັບໃຊ້ບໍລິຫານປົກກະຕິມີ 25,60 ຕື້ກີບ, ຈ່າຍດັດສົມ, ສົ່ງເສີມ ແລະ ບຳ ລຸງລວມ 11,72 ຕື້ກີບ, ຊື້ຊັບສົມບັດຮັບໃຊ້ບໍລິຫານລັດ 1 ຕື້ກີບ, ຈ່າຍອື່ນໆອີກຈຳນວນ 1,50 ຕື້ກີບ ແລະ ຈ່າຍການລົງທຶນຂອງລັດມູນຄ່າ 18,50 ຕື້ກີບ.
ຢ່າງໃດກໍດີ ເພື່ອຮັບປະກັນໃຫ້ແຜນພັດທະນາເສດຖະກິດ-ສັງຄົມ ໃນສົກປີ 2013-2014 ນີ້ ບັນລຸຜົນສຳເລັດຕາມເອກະສານລາຍງານຂອງພະແນກແຜນ ການ ແລະ ການລົງທຶນໃຫ້ຮູ້ວ່າ: ທຸກພະແນກການ, ອົງການ, ຫ້ອງການທຽບເທົ່າ ແລະ ບັນດາເມືອງ ຍັງຕ້ອງເອົາໃຈໃສ່ບາງມາດຕະການ ເປັນຕົ້ນແມ່ນ ໃຫ້ຖືເອົາແຜນພັດທະນາເສດຖະກິດ-ສັງຄົມ 3 ເດືອນທ້າຍປີເປັນໜ້າທີ່ການເມືອງ, ເປັນພັນທະ ແລະ ຄວາມຮັບຜິດ ຊອບຂອງວຽກງານຕົນ, ເພື່ອຈັດຕັ້ງປະ ຕິບັດແຜນດັ່ງກ່າວໃຫ້ບັນລຸຕາມຄາດໝາຍທີ່ກຳນົດໄວ້, ພ້ອມທັງມີຄວາມວ່ອງໄວ, ມີປະສິດທິພາບ, ປະສິດທິຜົນ ແລະ ມີຜົນສຳເລັດຢ່າງຕໍ່ເນື່ອງ, ເພີ່ມທະວີຄວາມຮັບຜິດຊອບໃນການຂຸດຄົ້ນແຫຼ່ງລາຍຮັບໃໝ່, ປະຕິບັດລະບຽບກົດໝາຍພາສີ-ອາກອນມູນຄ່າເພີ່ມ, ແກ້ໄຂບັນຫາທີ່ເປັນຊ່ອງຫວ່າງໃນການເກັບລາຍຮັບ ແລະ ຈຳກັດການຮົ່ວໄຫຼຂອງງົບປະມານຢ່າງສຸດຂີດ, ແລະ ເຄັ່ງຄັດການ ກໍປະຕິບັດລະບຽບວິໄນທາງດ້ານການເງິນຢ່າງເປັນເຈົ້າການ, ການຫັນທີ່ດິນ, ຫັນຊັບສິນໃຫ້ເປັນທຶນ ແລະ ລວມທັງການເພີ່ມທະວີປະຢັດມັດທະຫຍັດ, ຕ້ານການຟູມເຟືອຍ ແລະ ສະກັດກັ້ນການໃຊ້ຈ່າຍທີ່ບໍ່ກໍໃຫ້ເກີດຜົນປະໂຫຍດຕ່າງໆ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ