ໃນໄລຍະ
9 ເດືອນຂອງສົກງົບ ປະມານນີ້ ແຂວງຫົວພັນ
ສາມາດປະ ຕິບັດໂຄງການລົງທຶນຂອງພາກລັດໄດ້ທັງໝົດ 200 ກວ່າໂຄງການ
ໂດຍການນຳໃຊ້ທຶນສ່ວນໃຫຍ່ແມ່ນເນັ້ນໃສ່ສ້າງສິ່ງອຳນວຍຄວາມສະດວກໃນການພັດ
ທະນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກຂອງປະຊາຊົນ.
ອີງຕາມຂໍ້ມູນຈາກພະແນກແຜນການ ແລະ
ການລົງທຶນແຂວງຫົວພັນ ລາຍງານໃຫ້ຮູ້ວ່າ: ໃນສົກປີ 2013-2014
ແຂວງໄດ້ຮັບການອະນຸມັດໂຄງການລົງທຶນຂອງລັດ ຈຳນວນທັງໝົດ 278 ໂຄງການ ມູນຄ່າ 5.539,63 ຕື້ກີບ, ສະພາແຫ່ງຊາດ ອະນຸມັດໃນສົກປີນີ້ ເປັນມູນຄ່າ 125,11 ຕື້ກີບ ໃນນີ້ ທຶນພາຍໃນ 66,60 ຕື້ກີບ ແລະ ທຶນຕ່າງປະເທດຈຳນວນ 58,51 ຕື້ກີບ, ເປັນໂຄງການສຶບຕໍ່ 94 ໂຄງການສະ ເໜີໃໝ່ 174 ໂຄງການ.
ຜ່ານການຈັດຕັ້ງປະຕິບັດໃນໄລຍະ 9 ເດືອນມານີ້ ເຫັນໄດ້ວ່າ ທຸກພາກ ສ່ວນແມ່ນມີຄວາມຮັບຜິດຊອບຕໍ່ການຈັດຕັ້ງປະຕິບັດໂຄງການ
ແລະ ຫັນເຂົ້າສູ່ລະບຽບກົດໝາຍ, ສ່ວນການນຳໃຊ້ທຶນຂອງລັດຢູ່ແຂວງຫົວພັນກໍໄດ້ກາຍ
ເປັນປັດໄຈທີ່ສຳຄັນຕໍ່ການພັດທະນາເສດຖະກິດ-ສັງຄົມ ແລະ ແກ້ໄຂຄວາມ
ທຸກຍາກຂອງແຂວງນັບມື້ຫຼຸດລົງເທື່ອລະກ້າວ, ຊຶ່ງເຫັນໄດ້ຈາກການຈັດຕັ້ງປະຕິບັດໂຄງການລົງທຶນທັງໝົດ
203 ໂຄງການ ມູນຄ່າ 75,67 ຕື້ກີບ, ທຽບໃສ່ແຜນການປີປະຕິບັດໄດ້ 65,41%,
ໃນນັ້ນ ເປັນທຶນພາຍໃນ 48,19 ຕື້ກີບ ແລະ ທຶນຕ່າງປະເທດ 27,48 ຕື້ກີບ.
ນອກຈາກນັ້ນ ສຳລັບໂຄງການພັດທະນາຕົວເມືອງໃໝ່
(ເມືອງກວັນ) ໃນສົກນີ້ ກໍຍັງໄດ້ຮັບການລົງທຶນຈຳນວນ 17 ໂຄງການ ຄິດເປັນມູນຄ່າ 894,16 ຕື້ກີບ (ເປັນທຶນພາຍໃນ 100%),
ໃນນັ້ນ ເປັນໂຄງການສືບຕໍ່ 2 ໂຄງການ ແລະ ສະເໜີໃໝ່ 15 ໂຄງການ, ມາຮອດປະຈຸບັນ ຈັດຕັ້ງປະຕິບັດໄດ້ແລ້ວ 8 ໂຄງການ ມູນຄ່າ 7,67 ຕື້ກີບ, ທຽບໃສ່ແຜນການປີປະຕິບັດໄດ້ 79%.
ຄຽງຄູ່ກັບຜົນສຳເລັດທີ່ແຂວງສາ
ມາດຍາດມາໄດ້ໃນໄລຍະ 3 ໄຕມາດນັ້ນ
ກໍຍັງມີສິ່ງທ້າທາຍຕໍ່ກັບການປະຕິບັດວຽກງານ ເປັນຕົ້ນແມ່ນ
ການກວດກາຕິດຕາມ ແລະ ປະເມີນຜົນບັນດາໂຄງການທີ່ໄດ້ອະນຸມັດໄປແລ້ວນັ້ນ
ຍັງບໍ່ທັນ ແຂງແຮງ ສັນຍາຂອງບາງໂຄງການແມ່ນຍັງມີຄວາມຫຍຸ້ງຍາກ
ໃນການປະສານງານລະຫວ່າງໜ່ວຍງານທີ່ກ່ຽວຂ້ອງກັບໂຄງການ, ພ້ອມນັ້ນ ການຈັດ
ຕັ້ງປະຕິບັດໂຄງການຢູ່ທ້ອງຖິ່ນຍັງມີຄວາມຫຍຸ້ງຍາກເນື່ອງຈາກຍັງຂາດບຸກຄະລາກອນທີ່ມີຄວາມຮູ້, ຄວາມສາມາດ, ບວກກັບທຶນສົມທົບພາຍໃນບໍ່ພຽງພໍເຮັດໃຫ້ການປະຕິບັດຕົວຈິງເກີດມີຄວາມຊັກຊ້າ, ເມື່ອທຽບກັບຄວາມຕ້ອງການຂອງການພັດທະນາຕົວຈິງ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ