 |
| ຮູບມອບຮັບເສັນທາງເທດສະບານ ເມືອງຊຳເໜືອ-ບ້ານໜອງຄ້າງ |
ເປັນອີກໜຶ່ງຜົນສຳເລັດທີ່ແຂວງຫົວພັນສາມາດປະຕິບັດໄດ້ໃນໄລຍະ
3 ໄຕມາດຂອງປີນີ້ ຊຶ່ງເຫັນໄດ້ຈາກການເອົາໃຈໃສ່ຂອງທຸກພາກສ່ວນໃນການດຶງດູດນັກລົງທຶນພາຍໃນ
ແລະ ຕ່າງປະເທດໃຫ້ເຂົ້າມາລົງທຶນແລ້ວ 170 ກວ່າຕື້ກີບ, ໃນນີ້ທຶນທີ່ຍາດມາໄດ້ສ່ວນຫຼາຍສຸມໃສ່ຂະແໜງອຸດສາຫະກຳŒຫັດຖະກຳຜະລິດເປັນສິນຄ້າເພື່ອຮັບໃຊ້ພາຍໃນ
ແລະ ສົ່ງອອກຕ່າງປະເທດ.
ອີງຕາມຂໍ້ມູນຂອງພະແນກແຜນການ ແລະ ການລົງທຶນແຂວງຫົວພັນລາຍງານໃຫ້ຮູ້ວ່າ:
ຜ່ານການຈັດຕັ້ງປະຕິບັດໃນໄລຍະ 3 ໄຕມາດມານີ້ເຫັນວ່າໃນນາມ ແຂວງ
ກໍຄືພາກສ່ວນທີ່ກ່ຽວຂ້ອງໄດ້ສຸມທຸກຄວາມພະຍາຍາມ
ເພື່ອທີ່ຈະເຮັດໃຫ້ການປະຕິບັດແຜນການຊຸກຍູ້ສົ່ງເສີມການລົງທຶນຂອງພາກເອກະຊົນພາຍໃນ
ແລະ ຕ່າງປະເທດເປັນໄປຕາມທິດສົ່ງເສີມການລົງທຶນ ໂດຍສະເພາະແມ່ນການອຳນວຍຄວາມສະດວກດ້ານຕ່າງໆເຊັ່ນ:
ສ້າງຄວາມເຊື່ອໝັ້ນໃຫ້ກັບຜູ້ສົນໃຈເຂົ້າມາລົງທຶນບໍ່ວ່າຈະເປັນໂອກາດໃນການລົງທຶນ
ແລະ ບັນດານິຕິກຳທີ່ກ່ຽວຂ້ອງກັບການລົງທຶນບວກກັບທ່າແຮງບົ່ມຊ້ອນພາຍໃນແຂວງ
ຊຶ່ງທັງໝົດນີ້ ຈິ່ງເຮັດໃຫ້ແຂວງສາມາດລະດົມທຶນໄດ້ 6 ໂຄງການ ລວມເປັນມູນຄ່າ 21,92 ລ້ານໂດລາ ຫຼື ປະມານ 175,36 ຕື້ກີບ ແລະ ເປັນທຶນຈົດທະບຽນທັງໝົດແມ່ນ 10,49 ລ້ານໂດລາ ຫຼື ປະມານ 83,92 ຕື້ກີບ.
ໂຄງການລົງທຶນທັງໝົດນັ້ນແມ່ນຂັ້ນສູນກາງອະນຸຍາດ 2 ໂຄງການ ເປັນຮູບແບບຂອງການຮ່ວມທຶນຄິດເປັນມູນຄ່າ 17,06 ລ້ານໂດລາ ແລະ ອີກ 4 ໂຄງການແມ່ນຂັ້ນແຂວງເປັນຜູ້ອະນຸມັດ
ລວມມູນຄ່າ 6,50 ລ້ານໂດລາ, ໃນນັ້ນ ລົງທຶນໃສ່ຂະແໜງອຸດສາຫະກຳ-ຫັດຖະກຳ
3 ໂຄງການ, ຂະ ແໜງບໍ່ແຮ່ 2 ໂຄງການ ແລະ ຂະແໜງກະສິກຳ 1 ໂຄງການ, ພ້ອມກັນນັ້ນ ກໍຍັງມີບໍລິສັດມາເຊັນບົດບັນທຶກຄວາມເຂົ້າໃຈ
ເພື່ອສຶກສາ ແລະ ສຳຫຼວດຄວາມເປັນ ໄປໄດ້ໃນການກໍ່ສ້າງເຂື່ອນໄຟຟ້ານ້ຳຕົກຂະໜາດນ້ອຍນ້ຳ
ຢອງ 1 ໂຄງການ.
ຄຽງຄູ່ກັບຜົນສຳເລັດທີ່ແຂວງຍາດມາໄດ້ໃນໄລຍະຜ່ານມາ ແລະ
ເພື່ອເຮັດໃຫ້ການປະຕິບັດໃນໄຕມາດທີ 4 ນັ້ນກໍຄື 3 ເດືອນທ້າຍສົກປີນີ້ ບັນລຸຕາມຄາດໝາຍລວມພະແນກແຜນການ ແລະ ການ ລົງທຶນແຂວງຫົວພັນລະບຸວ່າ:
ຕ້ອງເອົາໃຈໃສ່ຊຸກຍູ້ສົ່ງເສີມການລົງທຶນພາຍໃນ ແລະ ຕ່າງປະເທດຢ່າງຫ້າວຫັນ
ໂດຍຜ່ານເຜີຍແຜ່ກົດໝາຍສົ່ງເສີມການລົງທຶນສະບັບປັບປຸງໃໝ່ໃຫ້ບັນດາເມືອງ
ແລະ ຫົວໜ່ວຍທຸລະກິດໄດ້ຮັບຮູ້, ເຂົ້າໃຈກ່ຽວກັບແນວທາງໃນການດຶງດູດນັກລົງທຶນໃຫ້ເຂົ້າມາລົງທຶນຫຼາຍຂຶ້ນໃນໄລຍະ
3 ເດືອນຂອງທ້າຍສົກປີຈະລະດົມທຶນໃຫ້ໄດ້ຕື່ມອີກ 2 ໂຄງການ ລວມເປັນ ມູນຄ່າ 3 ລ້ານໂດລາສະຫະລັດ.
ຢາກເຮັດໄດ້ຄືດັ່ງທີ່ກ່າວມານັ້ນແຂວງຫົວພັນ ຍັງຕ້ອງຕັ້ງໜ້າຈັດຕັ້ງປະຕິບັດການບໍລິການຜ່ານປະຕູດຽວໃຫ້ມີປະສິດທິຜົນແນໃສ່ເຮັດໃຫ້ການອະນຸມັດການລົງທຶນມີຄວາມກະທັດຮັດ, ວ່ອງໄວ ແລະ ໂປ່ງໃສຍິ່ງຂຶ້ນ, ນອກຈາກນັ້ນກໍຍັງຮຽກຮ້ອງໃຫ້ທຸກພະແນກການ, ຫ້ອງການທຽບເທົ່າອ້ອມຂ້າງແຂວງ ແລະ ບັນດາເມືອງຕ້ອງເພີ່ມທະວີຄວາມຮັບຜິດຊອບຮ່ວມກັນວຽກງານໃນແຜນການຈິ່ງຈະບັນລຸຜົນສຳເລັດ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ