ຂະແໜງທະນາຄານແຂວງຫົວພັນ ວາງເປົ້າຈະປ່ອຍສິນເຊື່ອສະໜອງຄວາມຕ້ອງການຂອງສັງຄົມໃນໄຕມາດທີ 4 ຂອງສົກປີ 2013-2014 ນີ້, ໃຫ້ໄດ້ 500 ກວ່າຕື້ກີບ.
ອີງຕາມພະແນກແຜນການ ແລະ ການລົງທຶນແຂວງຫົວພັນ ລາຍງານໃຫ້ຮູ້ວ່າ: ໃນໄລຍະ 3 ເດືອນທ້າຍສົກປີ 2013-2014 ນີ້, ແຂວງຍັງຕ້ອງໄດ້ເອົາໃຈໃສ່ສະກັດກັ້ນ ແລະ ແກ້ໄຂໜີ້ທວງຍາກໃຫ້ຢູ່ໃນຂອບຂໍ້ກຳນົດຂອງທະນາຄານແຫ່ງ ສປປ ລາວ ກຳນົດອອກ, ພ້ອມນັ້ນກໍສຸມໃສ່ປັບປຸງຂອດຂອງການບໍລິການໃຫ້ມີຄວາມສະດວກ ແລະ ວ່ອງໄວ ເພື່ອແນໃສ່ສ້າງຄວາມເຊື່ອໝັ້ນແກ່ລູກຄ້າລວມໄປເຖິງການສະໜອງດ້ານສິນເຊື່ອໃຫ້ພຽງພໍກັບຄວາມຕ້ອງການຂອງສັງຄົມ ແລະ ໃນການປ່ອຍສິນເຊື່ອສະເພາະໄຕມາດສຸດທ້າຍຂອງປີນີ້ຂະແໜງທະນາຄານແມ່ນຈະໃຫ້ໄດ້ 546,15 ກວ່າຕື້ກີບ.
ໃນນີ້ສະເພາະທະນາຄານສົ່ງເສີມກະສິກຳແມ່ນຈະສຸມໃສ່ລະດົມເງິນຝາກໃຫ້ໄດ້ທັງໝົດ 158,99 ຕື້ກີບ ແລະ ປ່ອຍສິນເຊື່ອໃຫ້ໄດ້ 127,20 ຕື້ກີບ ໃນນັ້ນ ປ່ອຍເຂົ້າຂະແໜງອຸດສາຫະກຳŒການຄ້າຈຳນວນ
8,25 ຕື້ກີບ, ກະສິກຳ 16,02 ຕື້ກີບ, ການກໍ່ສ້າງ 14,67 ຕື້ກີບ, ການຄ້າŒບໍລິການ 66,15 ຕື້ກີບ ແລະ ຂະແໜງການອື່ນໆ 22,09 ຕື້ກີບ, ພ້ອມນັ້ນກໍເອົາໃຈໃສ່ເກັບໜີ້ສິນໃຫ້ໄດ້ 21,26 ຕື້ກີບ ແລະ ລາຍຈ່າຍບໍ່ໃຫ້ເກີນ 20,57 ຕື້ກີບ.
ສ່ວນທະນາຄານການຄ້າຕ່າງປະເທດລາວ ມະຫາຊົນ ກໍຈະສຸມໃສ່ການລະດົມເງິນຝາກໃຫ້ໄດ້ທັງໝົດ 142 ຕື້ກີບ ແລະ ປ່ອຍສິນເຊື້ອໃນວົງເງິນ 117 ຕື້ກີບ ໂດຍເນັ້ນໃສ່ຂະ ແໜງການຄ້າŒການບໍລິການຈຳນວນ 970 ລ້ານກີບ, ກະສິກຳ 7,80 ຕື້ກີບ, ຂະແໜງກໍ່ສ້າງ 71,17 ຕື້ກີບ, ການຄ້າŒການບໍລິການ 35,11 ຕື້ກີບ ແລະ ຂະແໜງການອື່ນໆໃຫ້ໄດ້ 1,95 ຕື້ ກີບ, ພ້ອມນັ້ນ ກໍຈະເລັ່ງໃສ່ການເກັບໜີ້ສິນໃຫ້ໄດ້ທັງໝົດ 18,61 ຕື້ກີບ, ລາຍຈ່າຍ 17,25 ຕື້ກີບ.
ສຳລັບທະນາຄານພັດທະນາລາວ ຊຶ່ງເປັນທະນາຄານທີ່ສາມາດປ່ອຍກູ້ໄດ້ຫຼາຍໃນໄລຍະ 3 ໄຕມາດຜ່ານມາ, ກໍຍັງຈະລະດົມເງິນຝາກໃຫ້ໄດ້ທັງໝົດ 221,78 ຕື້ກີບ ແລະ ປ່ອຍສິນເຊື່ອໃຫ້ໄດ້179,71 ຕື້ກີບ, ໃນນັ້ນ ສິນເຊື່ອໄລ ຍະສັ້ນໃຫ້ໄດ້ 12,81 ຕື້ກີບ, ໄລຍະກາງແມ່ນ 163,38 ຕື້ກີບ ແລະ1,26 ຕື້ກີບ ສຳລັບໄລຍະຍາວຄາດວ່າຈະສາມາດສ້າງລາຍຮັບໃຫ້ໄດ້ 22,74 ຕື້ກີບ, ລາຍຈ່າຍບໍ່ໃຫ້ເກີນ 20,50 ຕື້ກີບ ແລະ ມອບພັນທະເຂົ້າງົບປະມານໃຫ້ໄດ້ 630 ລ້ານກີບ.
ກ່ຽວກັບທະນາຄານນະໂຍບາຍແມ່ນຈະເອົາໃຈໃສ່ເກັບກູ້ໜີ້ສິນ 3,25 ຕື້ກີບ, ລາຍຈ່າຍບໍ່ໃຫ້ເກີນ 2,73 ຕື້ກີບ, ປ່ອຍສິນເຊື່ອໃຫ້ໄດ້ 122,24 ຕື້ກີບ, ໃນນັ້ນ ຂະແໜງປູກຝັງ 10,60 ຕື້ກີບ, ລ້ຽງສັດ 66,86 ຕື້ກີບ, ຫັດຖະກຳ 10,11 ຕື້ກີບ, ອຸດສາຫະກຳປຸງແຕ່ງ ໄດ້ 1,47 ຕື້ກີບ, ການຄ້າŒການບໍລິການໄດ້ 23,20 ຕື້ກີບ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ