 |
| ຮູບປະກອບ |
ຫົວພັນ ເປັນອີກແຂວງໜຶ່ງທາງພາກເໜືອຂອງລາວທີ່ມີປະຊາກອນອາໄສຢູ່ຢ່າງຫຼວງຫຼາຍ ຊຶ່ງການຄຸ້ມຄອງຂອງອຳນາດການປົກຄອງກໍ່ຂ້ອນຂ້າງຈະຫຍຸ້ງຍາກສັບສົນ ແຕ່ຂະແໜງການກ່ຽວຂ້ອງກໍໄດ້ເອົາໃຈໃສ່ຈັດຕັ້ງປະຕິບັດວຽກງານດ້ານວັດທະນະທຳໃນໄລຍະ 9 ເດືອນ ປີນີ້ສາມາດປະກາດຮັບຮອງບ້ານວັດທະນະທຳໄດ້ຫຼາຍກວ່າ 70 ບ້ານ ແລະ ແຜນການ 3 ເດືອນທ້າຍສົກປີດຽວກັນແມ່ນຈະສືບຕໍ່ຈັດຕັ້ງປະຕິບັດຫຼາຍວຽກງານສຳຄັນ.
ອີງຕາມການລາຍງານຈາກພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫົວພັນໃຫ້ຮູ້ຫວ່າງບໍ່ດົນມານີ້ວ່າ: ໃນໄລຍະ 9 ເດືອນຂອງສົກປີ 2013-2014 ພະແນກ ຖວທ ພວກເຮົາໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວິຊາສະເພາະຕາມພາລະບົດບາດ, ສິດ ແລະ ໜ້າທີ່ຢ່າງຕັ້ງໜ້າ, ໃນນີ້ວຽກງານດ້ານວັດທະນະທຳ ພວກເຮົາໄດ້ຊຸກຍູ້ສົ່ງເສີມການເຄື່ອນໄຫວດ້ານສີລະປະວັດທະນະທຳ ຮີດຄອງປະເພນີ, ສີໄມ້ລາຍມືທີ່ເປັນເອກະລັກຂອງບັນດາເຜົ່າ, ຊຸກຍູ້ສ້າງຄອບຄົວ ແລະ ບ້ານວັດທະນະທຳທົ່ວແຂວງໃຫ້ມີການເຄືອນໄຫວຢ່າງຕໍ່ເນື່ອງ ຈົນສາມາດປະກາດບ້ານວັດທະນະທຳໄດ້ 73 ບ້ານ, ມີ 5.300 ຄອບຄົວ, ກຸ່ມບ້ານວັດທະນະທຳ 4 ກຸ່ມບ້ານ, ມາຮອດປະຈຸບັນທົ່ວແຂວງມີບ້ານວັດທະນະທຳທັງໝົດ 220 ບ້ານ, ກວມເອົາ 31% ຂອງຈຳນວນບ້ານທັງໝົດ, ມີຄອບຄົວວັດທະນະທຳ 21.405 ຄອບຄົວ, ກວມ 46% ຂອງຈຳນວນຄົວເຮືອນທັງໝົດ ແລະ ມີ 5 ກຸ່ມບ້ານວັດທະນະທຳ.
ດ້ານວຽກງານສີລະປະວັນນະຄະດີກໍ່ໄດ້ຮັບການຊຸກຍູ້ໃຫ້ເຄື່ອນໄຫວຢູ່ຕາມໂຮງຮຽນ, ກົມກອງ, ບ້ານຕ່າງໆເປັນປົກກະຕິ, ສູນວັດທະນະທຳເດັກກໍໄດ້ເຄື່ອນໄຫວໂດຍໄດ້ເຕົ້າໂຮມເດັກເຂົ້າຮ່ວມກິດຈະກຳ 32 ຄັ້ງ, ມີເດັກເຂົ້າຮ່ວມ 1.822 ເທື່ອຄົນ ແລະ ຈັດຕັ້ງສະເຫຼີມສະຫຼອງວັນເດັກນ້ອຍສາກົນປີ 2014 ຢ່າງມີບັນຍາກາດມ່ວນຊື່ນ, ຫໍສະໝຸດຂອງແຂວງໄດ້ຮັບການປັບປຸງດີຂຶ້ນ, ມີຜູ້ເຂົ້າຊົມໃຊ້ອ່ານປື້ມ 6 ພັນກວ່າເທື່ອຄົນ, ຈຳນວນປື້ມອ່ານນັບມື້ຫຼາຍຂຶ້ນ ແລະ ວິທີບໍລິການກໍໄດ້ຮັບການປັບປຸງເທື່ອລະກ້າວ, ຫໍວັດທະນະທຳກໍໄດ້ເຄື່ອນໄຫວການບໍລິການຮັບໃຊ້ສັງຄົມເຊັ່ນ: ຈັດກອງປະຊຸມ, ຈັດງານສຳມະນາ, ພິທີສະເຫຼີມສະຫຼອງວັນປະຫວັດສາດຂອງຊາດ ແລະ ເຂົ້າທ່ຽວຊົມອື່ນໆໃຫ້ແກ່ທັງພາກລັດ ແລະ ເອກະຊົນ.
ສຳລັບທິດທາງແຜນການ 3 ເດືອນທ້າຍສົກປີຈະສືບຕໍ່ຈັດຕັ້ງປະຕິບັດຫຼາຍວຽກ ງານສຳຄັນເປັນຕົ້ນ: ປຸກລະດົມຊຸກຍູ້ການເຄື່ອນໄຫວສີລະປະວັນນະຄະດີຢູ່ບັນດາບ້ານ, ກົມກອງ, ໂຮງຮຽນຕ່າງໆ ແລະ ຮ້ານບັນເທີງໃຫ້ເປັນຂະບວນຟົດຟື້ນ, ຖືກຕ້ອງຕາມລະບຽບກົດໝາຍ, ສອດຄ່ອງກັບມູນເຊື້ອຮີດຄອງປະເພນີອັນດີງາມຂອງທ້ອງຖິ່ນ, ຊຸກຍູ້ບັນດາເມືອງສືບຕໍ່ປົກປັກຮັກສາ ແລະ ຂະຫຍາຍຄອບຄົວ, ບ້ານ, ກົມກອງວັດທະນະທຳໃຫ້ເປັນຂະບວນກວ້າງຂວາງ ທັງຮັບປະກັນມາດຖານເງື່ອນໄຂ, ສູ້ຊົນປະກາດບ້ານວັດທະນະທຳໃຫ້ໄດ້ 17 ບ້ານ, ຄອບຄົວວັດທະນະທຳ 500 ກວ່າຄອບຄົວ, ປັບປຸງກົນໄກການບໍລິການ, ສົ່ງເສີມການອ່ານ, ການເຄື່ອນໄຫວກິດຈະກຳອື່ນໆຂອງຫໍສະໝຸດ, ສູນວັດທະນະທຳເດັກ ແລະ ຫໍວັດທະນະທຳແຂວງໃຫ້ດີຂຶ້ນ ເພື່ອຊຸກຍູ້ການເຄື່ອນໄຫວກິດຈະກຳດ້ານວັດທະນະທຳທີ່ສ້າງຄຸນປະໂຫຍດທາງດ້ານແນວຄິດຈິດໃຈໃຫ້ແກ່ສັງຄົມຢ່າງແຜ່ຫຼາຍ, ສືບຕໍ່ຄົ້ນຄວ້າເກັບກຳຂຽນປະຫວັດຄວາມເປັນມາ, ຮີດຄອງປະເພນີຂອງເຜົ່າ, ສຳຫຼວດຂຶ້ນບັນຊີສະຖິຕິບູຮານສະຖານ, ວັດຖຸບູຮານ, ມໍລະດົກທາງດ້ານວັດທະນະທຳໃນຂອບເຂດທົ່ວແຂວງ ເພື່ອຄຸ້ມຄອງອະນຸຮັກບໍ່ໃຫ້ສູນຫາຍ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ