ເມືອງວຽງໄຊ ເປັນອີກເມືອງໜຶ່ງຂອງແຂວງຫົວພັນ ທີ່ລືຊື່ເລື່ອງການທ່ອງທ່ຽວ ເນື່ອງຈາກວ່າພາຍໃນເມືອງມີສະຖານທີ່ທ່ອງທ່ຽວຫຼາຍແຫ່ງສວຍງາມ ແລະ ໂດດເດັ່ນ ບໍ່ວ່າຈະເປັນທາງດ້ານວັດທະນະທຳ, ທຳມະຊາດ ແລະ ປະຫວັດສາດ, ເຮັດໃຫ້ມີນັກທ່ອງທ່ຽວທັງພາຍໃນ ແລະ ຕ່າງປະເທດເດີນທາງເຂົ້າມາຢ້ຽມຢາມເປັນຈຳນວນບໍ່ໜ້ອຍສ້າງສີສັນບັນຍາກາດຢ່າງຄຶກຄື້ນໃນ ແຕ່ລະປີເຊັ່ນປີນີ້ມີນັກທ່ອງທ່ຽວ 12 ພັນກວ່າຄົນເຂົ້າມາຢ້ຽມຊົມ, ສ້າງລາຍຮັບທັງທາງກົງ ແລະ ທາງອ້ອມສູ່ສັງຄົມ ຊຶ່ງສາມາດຊ່ວຍເຮັດໃຫ້ຊີວິດການເປັນຢູ່ດີຂຶ້ນເທື່ອລະກ້າວ.
ອີງຕາມການເປີດເຜີຍຂອງ ທ່ານ ພູໂຊນ ທຳມະວິໄຊ ເຈົ້າເມືອງໆວຽງໄຊ ແຂວງຫົວພັນໃຫ້ຮູ້ວ່າ: ພັດທະນາຕົວເມືອງວຽງໄຊຕິດພັນການທ່ອງທ່ຽວ ພວກເຮົາໄດ້ອີງໃສ່ແຜນແມ່ບົດພັດທະນາເມືອງວຽງໄຊແຕ່ປີ 2006-2026 ຕາມ 5 ວິໄສທັດຄື: 1. ສ້າງເມືອງວຽງໄຊ
ເປັນເມືອງມໍລະດົກປະຫວັດສາດ ແລະ ທຳມະຊາດ; 2. ສ້າງເມືອງວຽງໄຊ ໃຫ້ເປັນເມືອງອຸດົມຮັ່ງມີ; 3. ສ້າງເມືອງວຽງໄຊໃຫ້ເປັນເມືອງສຸຂະອະນາໄມດີ; 4. ສ້າງເມືອງວຽງໄຊໃຫ້ເປັນ ຕົວເມືອງຍ່າງທ່ຽວຊົມ-ສະຫງົບ ແລະ 5. ສ້າງເມືອງວຽງໄຊໃຫ້ເປັນເມືອງສີຂຽວ ແລະ ສວຍງາມ, ສະນັ້ນ ພວກ ເຮົາໄດ້ຫາທຸກວິທີສຳຫຼວດ-ອອກແບບພັດທະນາຕົວເມືອງ, ໃນນີ້ ເມືອງໄດ້ອອກທຶນສຳຫຼວດອອກແບບທາງປູຢາງສອງຊັ້ນໄດ້ 7 ເສັ້ນ, ສະເໜີພະແນກການກ່ຽວຂ້ອງຂັ້ນແຂວງສ້າງເງື່ອນໄຂສຳຫຼວດອອກແບບ 3 ໂຄງການ ໃຫຍ່ເປັນຕົ້ນ: ໂຄງການສວນສາທາລະນະ-ໜອງນ້ຳ, ໂຄງການສູນການຄ້າ ແລະ ໂຄງການສະໜາມກີລາຄົບວົງຈອນ.
ສຳລັບສົກປີ 2013-2014 ໂຄງການທ່ອງທ່ຽວແມ່ນໄດ້ສຳເລັດການກໍ່ສ້າງທາງຍ່າງລຽບຕີນຜາ ແລະ ປັບປຸງແຫຼ່ງທ່ອງທ່ຽວ, ໄປພ້ອມກັບການທ່ອງທ່ຽວ, ພ້ອມນີ້ ກໍໄດ້ສ້າງກິດຈະກຳດຶງດູດນັກທ່ອງທ່ຽວເຂົ້າມາທ່ຽວຊົມເມືອງເປັນຕົ້ນ: ຈັດບຸນຊ່ວງເຮືອ, ບຸນຊົນເຜົ່າປະກອບມີ: ແຂ່ງຂັນກີລາພື້ນເມືອງ, ປະກວດວັນນະຄະດີ, ບົດຟ້ອນ, ບົດເພງ ແລະ ປະກວດຫັດຖະກຳຕ່ຳຜ້າແພ-ຈັກສານ, ຈາກສະພາບດັ່ງກ່າວ ເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວເມືອງປີ 2005 ມີ 2.053 ຄົນ, ມາເຖິງປະຈຸບັນກໍຄືສົກປີ 2013-2014 ມີ 12.174 ຄົນ, ຕໍ່ກັບສະພາບແນວນັ້ນເຮັດໃຫ້ອະນຸສອນສະຖານວຽງໄຊທີ່ຂຶ້ນກັບຫ້ອງວ່າການປົກຄອງແຂວງຫົວພັນເກັບລາຍຮັບໄດ້ 143.065.000 ກີບ.
ຢ່າງໃດກໍຕາມ ຕໍ່ກັບຜົນສຳເລັດດັ່ງກ່າວກໍຍັງມີຂໍ້ຫຍຸ້ງຍາກ ແລະ ສິ່ງທ້າທາຍຄື: ການທ່ອງທ່ຽວຍັງບໍ່ທັນແຂງແຮງ ເນື່ອງຈາກບໍ່ທັນມີປະສົບການ, ເອກະຊົນກໍບໍ່ທັນກ້າລົງທຶນພໍເທົ່າໃດ, ເສັ້ນທາງເຂົ້າມາຍັງຫຍຸ້ງຍາກ, ການສ້າງສິ່ງອຳນວຍຄວາມສະດວກທາງ ດ້ານການສັນຈອນ, ຂໍ້ມູນ ແລະ ການບໍລິການຮັບໃຊ້ການທ່ອງທ່ຽວຍັງບໍ່ ທັນເຮັດໄດ້ດີ ແລະ ການໂຄສະນາຍັງບໍ່ທັນກວ້າງຂວາງ.
ຂະນະທີ່ ທິດທາງແຜນການໃນຕໍ່ໜ້າແມ່ນຈະປຸກລະດົມຊຸກຍູ້ວຽກງານການທ່ອງທ່ຽວ ໂດຍເລືອກເອົາໂຄງການທີ່ເໝາະສົມກ່ຽວກັບວິໄສທັດການສ້າງເມືອງວຽງໄຊໃຫ້ເປັນເມືອງທ່ອງທ່ຽວ ສ້າງຄວາມໝັ້ນໃຈໃຫ້ນັກທຸລະກິດທັງ ພາຍໃນ ແລະ ຕ່າງປະເທດຖ້າມາລົງທຶນ, ເອົາໃຈໃສ່ວຽກງານໂຄສະນາທາງດ້ານອິນເຕີເນັດໃຫ້ນັບມື້ກວ້າງຂວາງ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ