 |
| ໂຄງການກໍ່ສ້າງຫໍພິພິດຕະພັນປະຫັວສາດທີ່ເມືອງວຽງໄຊ |
ແຂວງຫົວພັນແມ່ນແຂວງໜຶ່ງທີ່ໄດ້ມີຄວາມພະຍາຍາມໃນການຊຸກຍູ້ສົ່ງເສີມຄຸ້ມຄອງການລົງທຶນທັງພາຍໃນ ແລະ ຕ່າງປະເທດ ທັງນີ້ ກໍເພືອເປັນສ່ວນໜຶ່ງໃນການປະກອບສ່ວນພັດທະນາເສດຖະກິດສັງຄົມ ແລະ ສ້າງວຽກເຮັດງານທຳໃຫ້ກັບປະຊາຊົນສະເພາະສົກປີຜ່ານມາໄດ້ມີໂຄງການລົງທຶນທັງໝົດເກືອບ 5 ຮ້ອຍໂຄງການມູນຄ່າພັນຕື້ກວ່າກີບ ໃນນັ້ນ ເປັນກິດຈະການສຳປະທານ 9 ຫົວໜ່ວຍ.
ເມື່ອວັນທີ 16-18 ທັນວານີ້ ໄດ້ມີການຈັດກອງປະຊຸມຄົບຄະນະບໍລິຫານງານພັກແຂວງຄັ້ງທີ 9 ສະໄໝທີ VIII ຂອງອົງຄະນະພັກແຂວງຫົວພັນຂຶ້ນທີ່ຫ້ອງວ່າການປົກຄອງແຂວງ ໂດຍເປັນປະທານຂອງສະຫາຍ ຄຳຮຸ່ງ ເຮື່ອງວົງສີ ກຳມະການສູນກາງພັກ ເລຂາຄະນະບໍລິຫານງານ ພັກແຂວງເຈົ້າແຂວງໆຫົວພັນ, ມີຄະນະບໍລິຫານງານພັກເມືອງ, ຫົວໜ້າພະແນກການ, ອົງການທຽບເທົາອ້ອມຂ້າງແຂວງເຂົ້າຮ່ວມ......
ກອງປະຊຸມໄດ້ຮັບຟັງການສະຫຼຸບຕີລາຄາຄືນການຈັດຕັ້ງປະຕິບັດວຽກງານຮອບດ້ານສົກປີ 2013-2014 ແລະ ທິດທາງແຜນການສົກປີ 2014-2015 ຊຶ່ງຜ່ານການຈັດຕັ້ງປະຕິບັດວຽກງານໃນໜຶ່ງປີຜ່ານມາເຫັນວ່າຫຼາຍໜ້າວຽກເຮັດ ໄດ້ສຳເລັດໂດຍພື້ນຖານເປັນຕົ້ນ: ແມ່ນການປະຕິບັດຕົວເລກມະຫາພາກລວມຍອດຜະລິດຕະພັນພາຍໃນບັນລຸໄດ້ 1.735,84 ຕື້ກີບ, ທຽບໃສ່ແຜນການຫຼຸດຄາດໝາຍປະມານ 4,27% ດ້ວຍຈັງຫວະການຂະຫຍາຍຕົວທາງດ້ານເສດຖະກິດຢູ່ໃນລະດັບ 10,17%.
ໃນນັ້ນ ກະສິກຳເພີ່ມຂຶ້ນ 9,08% ກວມເອົາ 54,07%, ອຸດສາຫະກຳເພີ່ມຂຶ້ນ 9,30% ກວມ 19,42% ແລະ ການບໍລິການເພີ່ມຂຶ້ນ 12,06% ກວມເອົາ 26,51% ສະເລ່ຍລາຍຮັບບັນລຸໄດ້ 5,88 ລ້ານກວ່າກີບ ຫຼື ເທົ່າກັບ 736 ໂດລາຕໍ່ຄົນຕໍ່ປີ.
ການລົງທຶນທັງໝົດບັນລຸໄດ້ 295 ໂຄງການເປັນມູນຄ່າ 137,11 ຕື້ກີບ ເປັນທຶນອານຸມັດປົກກະຕິ 278 ໂຄງການມີມູນຄ່າ 125,11 ຕື້ກີບ, ທຶນພາຍໃນ 66,60 ຕື້ກີບ ແລະ ທຶນຕ່າງປະເທດ 58,51 ຕື້ກີບ ແລະ ໃນຈຳນວນໂຄງການ ທັງໝົດນີ້ມີໂຄງການພັດທະນາເມືອງກວັນກວມເອົາ 17 ໂຄງການມູນຄ່າ 12 ຕື້ກີບ.
ພ້ອມດຽວກັນນັ້ນ ກໍໄດ້ສົ່ງເສີມຄຸ້ມຄອງການລົງທຶນພາຍໃນ ແລະ ຕ່າງປະເທດປະຕິບັດໄດ້ 494 ໂຄງການເປັນມູນຄ່າ 128,74 ລ້ານໂດລາສະຫະລັດ ຫຼື ປະມານ 1,02 ຕື້ກວ່າກີບທຽບໃສ່ແຜນການປີລື່ນຄາດໝາຍ 5 ເທົ່າຕົວ ໃນນັ້ນ ມີກິດຈະການສຳປະທານ 9 ຫົວໜ່ວຍ, ກິດຈະການທົ່ວໄປ 485 ຫົວໜ່ວຍ ນອກນັ້ນ ຍັງໄດ້ຮັບທຶນຊ່ວຍເຫຼືອລ້າ 51 ໂຄງການ, ມີມູນຄ່າ 23,41 ລ້ານໂດລາສະຫະລັດ ຫຼື ເທົ່າກັບ 187,33 ຕື້ກີບທຽບໃສ່ແຜນການປະຕິບັດໄດ້ລື່ນຄາດໝາຍ 52,88%.
ການດຸ່ນດຽງງົບປະມານຂອງແຂວງສຳລັບລາຍຮັບປະຕິບັດໄດ້ 55,95 ຕື້ ກີບລື່ນແຜນການ 48,46%, ດ້ານລາຍຈ່າຍປະຕິບັດໄດ້ 434,14 ຕື້ກີບທຽບໃສ່ແຜນການຫຼຸດຄາດໝາຍ 16,48% ເຫັນວ່າແຂວງຫົວພັນຍັງຂາດດຸນງົບປະມານ 370,19 ຕື້ກີບ ສ່ວນການຜະລິດເຂົ້າໄດ້ 107,302 ໂຕນລື່ນຄາດໝາຍ 2,97%, ມີສັດລ້ຽງທັງໝົດ 10.45 ລ້ານໂຕທຽບໃສ່ແຜນການປີຫຼຸດຄາດໝາຍ19.43%
ຂະນະທີ່ ການປະຕິບັດບັນດາເປົ້າໝາຍສະຫັດສະຫວັດດ້ານການພັດທະນາຮອດປະຈຸບັນມີຫຼາຍເປົ້າໝາຍສາມາດຈັດຕັ້ງປະຕິບັດໄດ້ຕາມແຜນການເປັນຕົ້ນແມ່ນອັດຕາຄວາມທຸກຍາກໄດ້ຫຼຸດລົງຈາກ 37,62% ໃນສົກປີ 2012-2013 ມາເປັນ 30,47%, ອັດຕາຄວາມສະເໝີພາບລະຫວ່າງຍິງ-ຊາຍຊັ້ນມັດທະຍົມປາຍປະຕິບັດໄດ້ 0,7% ທຽບໃສ່ເປົ້າໝາຍທີ 1 ຍັງບໍ່ທັນບັນລຸຕາມ ຄາດໝາຍ, ເດັກໃນເກນອາຍຸໄດ້ຮັບການສັກຢາກວມ 90%, ຝາກທ້ອງປະຕິບັດໄດ້ 51% ແລະ ອັດຕາສ່ວນຮ້ອຍກໍລະນີວັນນະໂລກຄົ້ນພົບປະຕິບັດໄດ້ 8,85%.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ