ເປັນປີທີ 2 ຕິດຕໍ່ກັນທີ່ແຂວງຫົວພັນ ໄດ້ລາງວັນລະດັບໂລກດ້ານການທ່ອງທ່ຽວ ຍ້ອນສະເໜຄວາມງົດງາມທາງທຳມະຊາດຂອງປ່າສະຫງວນ ລຽບນ້ຳເນີນແດນແຫ່ງການຜະຈົນໄພເປັນຕົວຊ່ວຍ.
ສະນັ້ນ ໃນແລງວັນທີ 23 ທັນວາ 2014 ນີ້, ທີ່ຫໍວັດທະນະທຳ ແຂວງຫົວພັນ ຈິ່ງໄດ້ຈັດພິທີສະຫຼອງຂັນລາງວັນດີເດັ່ນລະດັບໂລກດ້ານການທ່ອງທ່ຽວທີ່ມີຄວາມຮັບຜິດຊອບຕໍ່ສິ່ງແວດລ້ອມທຳມະຊາດ ແລະ ສັງຄົມ (ແຫຼ່ງ ທ່ອງທ່ຽວທຳມະຊາດນ້ຳເນີນ ເມືອງຫົວເມືອງ) 2 ປີຊ້ອນຄື: ວັນທີ 6 ພະຈິກ 2013 ແລະ ວັນທີ 5 ພະຈິກ 2014 ໃນຫົວຂໍ້: ແຫຼ່ງທ່ອງທ່ຽວຊົມສັດປ່າກາງຄືນລ່ອງນ້ຳເນີນທີ່ສູນທ່ອງທ່ຽວໂລກທີ່ນະຄອນຫຼວງລອນດອນ ປະເທດອັງກິດ.
ໂດຍການເຂົ້າຮ່ວມຂອງ ທ່ານ ຄຳຮຸ່ງ ເຮືອງວົງສີ ເຈົ້າແຂວງໆຫົວພັນ, ມີບັນດາຫົວໜ້າ-ຮອງຫົວໜ້າພະແນກ ການທີ່ກ່ຽວຂ້ອງອ້ອມຂ້າງແຂວງ, ຄະນະກອງບັນຊາການ ປກສ, ປກຊ, ເຈົ້າເມືອງທີ່ມາຈາກ 5 ເມືອງຄື:
ເມືອງຮ້ຽມ, ເມືອງຊ່ອນ, ເມືອງຫົວເມືອງ, ເມືອງຊຳເໜືອ ແລະ ເມືອງແອດ ແລະ ມີເຈົ້າເມືອງທີ່ມາຈາກເມືອງວຽງຄຳ ເມືອງໂພນໄຊ ແຂວງຫຼວງພະບາງ ແລະ ນາຍບ້ານອ້ອມຂ້າງເຂດປ່າສະຫງວນຈຳນວນ 14 ບ້ານເຂົ້າຮ່ວມນຳ.
ເມືອງຮ້ຽມ, ເມືອງຊ່ອນ, ເມືອງຫົວເມືອງ, ເມືອງຊຳເໜືອ ແລະ ເມືອງແອດ ແລະ ມີເຈົ້າເມືອງທີ່ມາຈາກເມືອງວຽງຄຳ ເມືອງໂພນໄຊ ແຂວງຫຼວງພະບາງ ແລະ ນາຍບ້ານອ້ອມຂ້າງເຂດປ່າສະຫງວນຈຳນວນ 14 ບ້ານເຂົ້າຮ່ວມນຳ.
ໃນພິທີ ທ່ານ ເຮືອງສີ ແກ້ວພົມມາ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ຜ່ານບົດສະເໜີກ່ຽວກັບການຄຸ້ມຄອງປ່າສະຫງວນແຫ່ງຊາດນ້ຳແອດພູເລີຍ ຊຶ່ງເຂດປ່າສະຫງວນດັ່ງກ່າວເປັນປ່າສະຫງວນແຫ່ງຊາດແຫ່ງທີ 1 ທີ່ນອນໃນ 24 ເຂດຂອງປ່າສະຫງວນແຫ່ງຊາດໃນ ສປປ ລາວໄດ້ຖືກສ້າງຕັ້ງຂື້ນໃນວັນທີ 29 ຕຸລາ 1993 ມີເນື້ອທີ່ທັງໝົດ 420. 000 ເຮັກຕາ, ກວມເອົາເນື້ອທີ່ 3 ແຂວງ 9 ເມືອງຄື: ແຂວງຫົວພັນກວມເອົາ 5 ເມືອງຄື: ເມືອງແອດ, ເມືອງຊຳເໜືອ, ເມືອງຫົວເມືອງ, ເມືອງຮ້ຽມ ແລະ ເມືອງຊ່ອນ, ແຂວງຫຼວງພະບາງກວມເອົາ 3 ເມືອງຄື: ເມືອງວຽງຄຳ, ເມືອງໂພນໄຊ ແລະ ເມືອງໂພນທອງ, ແຂວງ ຊຽງຂວາງກວມເອົາ 1 ເມືອງຄື: ເມືອງພູກູດ.
ໃນນີ້ ແບ່ງອອກເປັນ 3 ເຂດຄື: ເຂດຫວງຫ້າມເດັດຂາດ, ເຂດເຊື່ອມຕໍ່ມີເນື້ອທີ່ 300.000 ເຮັກຕາ ແລະ ເຂດ ຄຸ້ມຄອງນຳໃຊ້ມີ 120.000 ເຮັກຕາ.
ປ່າສະຫງວນນ້ຳແອດ-ພູເລີຍໄດ້ ກາຍເປັນທີ່ຍອມຮັບຈາກສາກົນວ່າ ເປັນປ່າສະຫງວນທີ່ອຸດົມສົມບູນໄປ ດ້ວຍຊີວະນາໆພັນເປັນເຮືອນຮັງຂອງຊະນິດພັນສັດປ່າ ແລະ ຊັບພະຍາກອນປ່າໄມ້ທີ່ມີຄວາມສຳຄັນຕໍ່ວົງຄະນາຍາດໃນຂົງເຂດພາກພື້ນ ແລະ ໃນໂລກ, ຍັງເປັນແຫຼ່ງຍອດນ້ຳທີ່ສຳຄັນຂອງບັນດາເມືອງກໍຄືແຂວງທີ່ມີ ເຂດແດນຕິດຈອດກັນສິ່ງສຳຄັນທີ່ສຸດເປັນປ່າແຫ່ງດຽວໃນ ສປປ ລາວ ແລະ ເປັນຜືນປ່າແຫ່ງສຸດທ້າຍໃນປະເທດອິນດູຈີນທີ່ໄດ້ຢັ້ງຢືນວ່າມີເສືອໂຄ່ງທີ່ສາມາດຂະຫຍາຍພັນຕາມທຳມະຊາດໄດ້ພ້ອມທັງເປັນບ່ອນຂະຫຍາຍພັນສັດຊະນິດອື່ນໆ, ເປັນບ່ອນສຶກສາຄົ້ນຄວ້າ ແລະ ຮອງຮັບຕໍ່ການຫຼຸດຜ່ອນການປ່ຽນແປງດິນຟ້າອາກາດ.
ອີກດ້ານໜຶ່ງປ່າສະຫງວນແຫ່ງຊາດນ້ຳແອດ-ພູເລີຍຍັງມີທ່າແຮງໃນການພັດທະນາແຫຼ່ງທ່ອງທ່ຽວແບບທຳມະຊາດ ຊຶ່ງເປັນແຫຼ່ງລາຍຮັບອັນໜຶ່ງເພື່ອປັບປຸງຊີວິດການເປັນຢູ່ຂອງປະຊາຊົນທ້ອງຖິ່ນໃຫ້ດີຂຶ້ນ.
ໂອກາດນີ້ ທ່ານຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຍັງໄດ້ຮຽກຮ້ອງມາ ຍັງອົງການຈັດຕັ້ງຕ່າງໆທັງພາກລັດ ແລະ ເອກະຊົນ, ອຳນາດການປົກຄອງທ້ອງຖິ່ນພາຍໃນແຂວງ, ເມືອງທີ່ກ່ຽວ ຂ້ອງ ແລະ ປະຊາຊົນບັນດາເຜົ່າໃນສັງຄົມຈົ່ງເປັນເຈົ້າການໃນການຮ່ວມມື ແລະ ສະໜັບສະໜູນຊ່ວຍເຫຼືອແກ່ການຄຸ້ມຄອງປ່າສະຫງວນແຫ່ງຊາດນ້ຳແອດ-ພູເລີຍໃຫ້ກາຍເປັນປ່າສະຫງວນຕົວແບບໃນປະເທດ ແລະ ພາກພື້ນ ພ້ອມກັນນັ້ນ ກໍໃຫ້ການຊຸກຍູ້ສົ່ງເສີມໂຄສະນາການອະນຸລັກຊັບພະຍາກອນທຳມະຊາດ ແລະ ຊີວະນາໆພັນໃຫ້ສັງຄົມມີຄວາມເຂົ້າໃຈຫຼາຍຂຶ້ນ.
ແຫລ່ງຂ່າວຈາກ: ຫນັງສືພີມເສດຖະກິດ-ສັງຄົມ