ອີງຕາມການເປີດເຜີຍໃນກອງປະຊຸມຄົບຄະນະບໍລິຫານງານພັກ ແຂວງຄັ້ງທີ 9 ສະໄໝທີ VIII ຂອງ ອົງຄະນະພັກແຂວງຫົວພັນໃຫ້ຮູ້ ຫວ່າງບໍ່ດົນມານີ້ວ່າ: ຜ່ານການຈັດຕັ້ງປະຕິບັດວຽກງານດ້ານການທ່ອງທ່ຽວໃນໜຶ່ງປີຜ່ານມາເຫັນວ່າ
ເຮັດໄດ້ສຳເລັດໂດຍພື້ນຖານເປັນຕົ້ນ: ແມ່ນການສ້າງເສັ້ນທາງເຂົ້າຫາບ້ານ ຊຶ່ງແລ່ນໄດ້ທັງສອງ ລະດູປະຕິບັດໄດ້ 100%, ສາມາດພັດທະນາ ແລະ ບູລະນະສະຖານທີ່ທ່ອງທ່ຽວທາງວັດທະນະທຳ, ທຳມະຊາດ ແລະ ປະຫວັດສາດລວມທັງໝົດໄດ້ 141 ແຫ່ງ, ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມແຂວງຫົວພັນໄດ້ສູງເຖິງ 35.711 ຄົນ, ນອກ ນີ້ ຍັງມີຫຼາຍໆໜ້າວຽກທີ່ທາງແຂວງກໍຄືພາກສ່ວນທີ່ກ່ຽວຂ້ອງ ສາມາດປະຕິບັດໄດ້ບັນລຸຕາມຄາດໝາຍ.
ສຳລັບທິດທາງແຜນການໃນຕໍ່ໜ້າແຂວງຫົວພັນຈະສືບຕໍ່ເຜີຍແຜ່ຄວາມໝາຍ, ຄວາມສຳຄັນຂອງວຽກງານຈັດລະດັບຂັ້ນຂອງໂຮງແຮມ, ເຮືອນພັກ ແລະ ຮ້ານອາຫານໃຫ້ຫົວໜ່ວຍທຸລະກິດ, ປະສານສົມທົບກັບພາກສ່ວນ ກ່ຽວຂ້ອງຂັ້ນແຂວງ, ຂັ້ນເມືອງ ເພື່ອລົງປະເມີນ, ກວດກາບັນດາຫົວໜ່ວຍທຸລະກິດບໍລິການ, ຊຸກຍູ້ສົ່ງເສີມການປະກອບເອກະສານໃຫ້ບັນດາຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມລະບຽບຫຼັກການ ແລະ ສ້າງຕັ້ງຄະນະກຳມະການກວດກາເພື່ອເຄື່ອນໄຫວຈັດຕັ້ງປະຕິບັດກວດກາປະເມີນຮ້ານອາຫານ ແລະ ຮ້ານກິນດື່ມພາຍໃນແຂວງໃຫ້ມີຄຸນນະພາບ ແລະ ໄດ້ຕາມມາດຕະຖານ.
ສ່ວນດ້ານພື້ນຖານຮອງຮັບນັກທ່ອງທ່ຽວທີ່ເຂົ້າມາທ່ອງທ່ຽວ ແຂວງດັ່ງກ່າວນັ້ນ ແມ່ນຖືວ່າພຽງພໍກັບຄວາມຕ້ອງການເຊັ່ນ: ໂຮງແຮມ, ເຮືອນພັກ ມີທັງໝົດ 54 ແຫ່ງ, ຮ້ານອາຫານ, ຮ້ານກິນດື່ມ 169 ແຫ່ງ ແລະ ຮ້ານບັນເທິງມີ 4 ແຫ່ງ.
ຂ່າວຈາກ: ຫນັງສືພີມເສດຖະກິດ-ສັງຄົມ