ແຂວງຫົວພັນ ເປັນແຂວງທີ່ມີເອກະລັກສະເພາະທາງດ້ານສີໄມ້ລາຍມືທີ່ໂດດເດັ່ນ ແລະບໍ່ຊ້ຳແບບໃນເລື່ອງຂອງການຜະລິດຫັດຖະກຳຕ່ຳຫູກທໍໄໝທີ່ເປັນມູນເຊື້ອ ຊຶ່ງສາມາດສ້າງເງິນໄດ້ຫຼາຍກວມອັດຕາສ່ວນກວ່າເຄິ່ງໜຶ່ງຂອງມູນຄ່າການສົ່ງອອກໃນ 6 ເດືອນປີນີ້.
ພະແນກແຜນການ ແລະການລົງທຶນແຂວງຫົວພັນໃຫ້ຮູ້ວ່າ: ສະເພາະໃນ 6 ເດືອນຕົ້ນ, ເຖິງວ່າລາຄາສິນຄ້າສົ່ງອອກຫຼາຍຢ່າງຈະມີລາຄາຕ່ຳລົງ ແຕ່ໃນທາງກັບກັນການຜະລິດອຸດສາຫະກຳປຸງແຕ່ງ ແລະຫັດຖະກຳຜັດມີທ່າອຽງດີຂຶ້ນບັນລຸໄດ້ 41,17 ຕື້ກີບ, ໃນນີ້ ອຸດສາຫະກຳປຸງແຕ່ງມູນຄ່າ 13,5 ຕື້ກີບ ແລະຫັດຖະກຳ 27,6 ຕື້ກີບທີ່ເດັ່ນກວ່າໝູ່ແມ່ນການຫັດຖະກຳຕ່ຳຫູກກວມເອົາ 70% ຂອງມູນຄ່າຫັດຖະກຳ, ດັ່ງນັ້ນ ຈິ່ງເຮັດໃຫ້ມູນຄ່າສົ່ງອອກບັນລຸໄດ້ 12,26 ລ້ານໂດລາ ຫຼື ປະມານ 98 ຕື້ກີບ ແລະ ມູນຄ່ານຳເຂົ້າມີ 35,60 ຕື້ ກີບ, ເຮັດໃຫ້ແຂວງມີຍອດເກີນດຸນແລ້ວ
7,81 ລ້ານໂດລາ.
ໂດຍໃນ 6 ເດືອນຕົ້ນປີນີ້ມູນຄ່າການເກັບຊື້ທົ່ວແຂວງປະຕິບັດໄດ້ 193,26 ຕື້ກີບ, ການຈໍລະຈອນຂາຍຍ່ອຍ 121,48 ຕື້ກີບ, ຂາຍຍົກ 29,57 ຕື້ກີບ, ຊຶ່ງທົ່ວແຂວງມີໂຮງງານທັງໝົດ 132 ແຫ່ງ, ສາມາດຕ່ຳສິ້ນໄດ້ 18.151 ຜືນ ມູນຄ່າ 2,17 ຕື້ກີບ, ຕ່ຳຜ້າໄດ້ 25.288 ແມັດ ລວມມີ 1,60 ຕື້ກີບ, ຜະລິດເສັ້ນໄໝ 760 ລ້ານກີບ ແລະຜະລິດຫັດຖະກຳ 5,02 ລ້ານກີບ.
ສຳລັບທິດທາງແຜນການໃນ 6 ເດືອນທ້າຍປີ ແຂວງໄວ້ວາງຄາດໝາຍ ລວມຍອດການສົ່ງອອກປະມານ 180 ຕື້ກວ່າກີບ ຫຼື 22,54 ລ້ານໂດລາ ແລະ ມູນຄ່ານຳເຂົ້າ 137 ຕື້ກວ່າກີບ ຫຼື ປະມານ 17,15 ລ້ານໂດລາ, ທັງນີ້ ແຂວງຈຳຕ້ອງສືບຕໍ່ຊຸກຍູ້ສົ່ງເສີມການຜະລິດເປັນສິນຄ້າໃຫ້ເປັນຂະບວນຟົດຟື້ນ, ປັບປຸງພື້ນຖານໂຄງລ່າງດ້ານການຄ້າ-ການບໍລິການໃຫ້ມີຄວາມພ້ອມ, ຄຸ້ມຄອງຕະຫຼາດ ແລະລາຄາສິນຄ້າໃຫ້ໄປຕາມລະບຽບກົດໝາຍ, ພ້ອມທັງສູ້ຊົນໃຫ້ມູນຄ່າຂາຍຍ່ອຍໄດ້ 422 ຕື້ກີບ, ຂາຍຍົກ 64,34 ຕື້ກີບ ແລະມູນຄ່າເກັບຊື້ສິນຄ້າ 199,41 ຕື້ກີບ, ພັດທະນາຄຸນນະ ພາບສິນຄ້າຕົ້ນຕໍສິນຄ້າໜຶ່ງເມືອງໜຶ່ງຜະລິດຕະພັນໃຫ້ໄດ້ມາດຕະຖານ, ເພີ່ມທະວີການຮ່ວມມືການຄ້າກັບປະເທດອ້ອມຂ້າງ, ສ້າງເງື່ອນໄຂອຳນວຍຄວາມສະດວກໃຫ້ນັກທຸລະກິດ ແລະປະຊາຊົນມີການແລກປ່ຽນຊື້ຂາຍສິນຄ້າຮ່ວມກັນ.
ນອກຈາກນັ້ນ ຍັງສືບຕໍ່ປຸກລະດົມນັກທຸລະກິດທັງພາຍໃນ ແລະຕ່າງປະເທດເຂົ້າມາລົງທຶນສ້າງຕັ້ງໂຮງງານຊີມັງ, ປັ້ນຫຼໍ່ແບບທັນສະໄຫມ, ປຸງແຕ່ງຜົນຜະລິດກະສິກຳ ແລະອື່ນໆ, ສົ່ງເສີມການຜະລິດຫັດຖະກຳທີ່ເປັນມູນເຊື້ອ ແລະ ທ່າແຮງຂອງແຂວງ ຄືສິນຄ້າຫັດຖະກຳຜ້າແພໄໝມ້ອນ, ຈັກສານ, ເຄາະຈອດ ແລະເຟີນີເຈີ ໃຫ້ເປັນຂະບວນຟົດຟື້ນ ຄາດວ່າມູນຄ່າອຸດສາຫະກຳ-ຫັດຖະກຳໃຫ້ບັນລຸ 191 ຕື້ກກີບ, ໃນນີ້ອຸດສາຫະກຳປຸງແຕ່ງ 40 ຕື້ກີບ ຫຼື ເທົ່າກັບ 20,9% ແລະອີກ 151 ຕື້ກີບ ແມ່ນຫັດຖະກຳເທົ່າ 97,1%.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ