ຕາມການໃຫ້ຮູ້ຂອງທ່ານ ບຸນຮຽງ ດວງບຸດທອງ ຫົວໜ້າລັດວິສາຫະກິດໄຟຟ້າລາວສາຂາແຂວງຫົວພັນເມື່ອບໍ່ດົນນີ້ວ່າ: ລັດວິສາຫະກິດໄຟຟ້າແຂວງຫົວພັນ ນອກຈາກຈະເຮັດພາລະບົດບາດໃນການບໍລິຫານ, ຄຸ້ມຄອງ, ຈຳໜ່າຍ, ບໍລິການ, ບຳລຸງຮັກສາສ້ອມແປງ, ເກັບກູ້ໜີ້ສິນກະແສໄຟຟ້າ, ຄຸ້ມຄອງພະລັງງານໄຟຟ້າຕົກເຮ່ຍໃຫ້ໄດ້ໜ້ອຍທີ່ສຸດ, ໝາຍຄວາມວ່າດຳເນີນທຸລະກິດໃຫ້ມີປະສິດທິຜົນແລ້ວຍັງເຮັດໜ້າທີ່ຮັບໃຊ້ແຜນພັດທະນາເສດຖະກິດŒສັງຄົມຂອງອົງຄະນະພັກແຂວງ, ອົງຄະນະພັກເມືອງ, ກຸ່ມບ້ານ, ບ້ານ ແລະ ທຸກຄອບຄົວໃຫ້ໄດ້ມີໄຟຟ້າໃຊ້ຢ່າງພ້ອມພຽງປະກອບສ່ວນເຂົ້າໃນການແກ້ໄຂຄວາມທຸກຍາກຂອງປະຊາຊົນບັນດາເຜົ່າໃນທົ່ວແຂວງຫົວພັນ, ກໍຄືການຍົກລະດັບຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.
ຄວາມເອົາໃຈໃສ່ປະຕິບັດໜ້າທີ່ໆໄດ້ຮັບມອບໝາຍດ້ວຍຄວາມຮັບຜິດຊອບຈິ່ງເຮັດໃຫ້ປະຊາຊົນໃນ 10 ເມືອງ, ມີ 4-21 ບ້ານ ກວມເອົາ 58,8% ຂອງຈຳນວນບ້ານໃນທົ່ວແຂວງ, ມີ 31,419 ຄອບຄົວໄດ້ຊົມໃຊ້ໄຟຟ້າກວມເອົາ 67,15% ຂອງຈຳນວນຄົວເຮືອນໃນທົ່ວແຂວງ ເມື່ອທຽບໃສ່ 5 ປີຜ່ານມາອັດຕາການຊົມໃຊ້ເພີ່ມຂຶ້ນ 29,15%.
ຊຶ່ງທ່ານກ່າວວ່າ: ອັດຕາການຊົມໃຊ້ ໄຟຟ້າຂອງປະຊາຊົນມີລັກສະນະເພີ່ມຂຶ້ນໃນທົ່ວແຂວງກໍ່ຍ້ອນພັກŒລັດກໍຄືກະຊວງພະລັງງານບໍ່ແຮ່ທີໄດ້ມີຄວາມພະຍາຍາມສຸມທຶນຮອນເຂົ້າໃນການຂະຫຍາຍຕາຂ່າຍໄຟຟ້ານັບທັງສາຍສົ່ງ ແລະ ສະຖານີໄຟຟ້າຢ່າງຕໍ່ເນື່ອງຊຶ່ງນຳເຂົ້າຈາກ 2 ແຫຼ່ງຄື: ຈາກ ສສ ຫວຽດນາມ ດ້ວຍລະບົບ 35 ກິໂລວັດມົກເຈົາŒຊຳເໜືອ, ປະຈຸບັນແຫຼ່ງດັ່ງກ່າວແມ່ນຮັບໃຊ້ເຂດ 3 ເມືອງຄື: ເມືອງແອດ, ຊຽງຄໍ້ ແລະ ສົບເບົາ; ແຫຼ່ງທີສອງແມ່ນຜ່ານລະບົບສາຍສົ່ງສະຖານີໄຟຟ້າ 115 ກິໂລ ໂວນຈາກໂພນສະຫວັນຫາຊຳເໜືອ (ຈາກເຂື່ອນໄຟຟ້ານ້ຳເລິກ) ແຫຼ່ງນີ້ແມ່ນສະໜອງໄຟຟ້າຮັບໃຊ້ເຂດເມືອງຊຳເໜືອ, ວຽງໄຊ, ຊຳໃຕ້, ເມືອງກວັນ, ຫົວເມືອງ, ເມືອງຮ້ຽມ ແລະ ເມືອງຊ່ອນແຕ່ການສະໜອງໄຟຟ້າໃນສອງແຫຼ່ງນີ້ໃນໄລຍະຜ່ານມາຖ້າທຽບໃສ່ຄວາມຮຽກຮ້ອງຕ້ອງການໃນການບໍລິການຊົມໃຊ້ຂອງປະຊາຊົນໃນສັງຄົມຍັງມີຂໍ້ຈຳກັດຫຼາຍ, ເນື່ອງຈາກລະບົບສາຍສົ່ງ ໄຟຟ້າ 115 ກິໂລໂວນຍາວໄກ, ມັກເກີດໄຟຕົກມອດ ໂດຍສະເພາະແມ່ນໄລຍະລະດູແລ້ງໃນແຕ່ລະປີຍ້ອນປະລິມານນ້ຳໃນອ່າງເຂື່ອນບໍ່ຫຼາຍ.
ນອກຈາກນີ້ລັດວິສາຫະກິດໄຟຟ້າແຂວງຫົວພັນຍັງໄດ້ມີນະໂຍບາຍດ້ວຍການສ້າງເງື່ອນໄຂ ແລະ ອຳນວຍຄວາມສະດວກໃຫ້ຈຳນວນຄອບຄົວທີ່ທຸກຍາກໄດ້ມີໂອກາດໃຊ້ໄຟຟ້າຊຶ່ງນະໂຍບາຍດັ່ງກ່າວໄຟຟ້າລາວສາຂາຫົວພັນໄດ້ບໍລິການມີ 320 ບ້ານ, ມີ 2.786 ຄົວເຮືອນ. ຊຶ່ງຈຳນວນຄອບຄົວທຸກຍາກດັ່ງກ່າວທາງລັດວິສາຫະກິດໄຟຟ້າລາວໄດ້ຊ່ວຍເຫຼືອລ້າລະບົບກົງເຕີ ແລະ ພາກອຸປະກອນຫົວເສົາຄິດເປັນມູນຄ່າທັງໝົດ 1,4 ຕື້ກວ່າກີບ. ນອກຈາກນັ້ນຍັງໄດ້ລົງທຶນກ່ອນໃນພາກຕິດຕັ້ງໄຟຟ້າໃນເຮືອນຊຶ່ງປະກອບມີດອກໄຟຟ້າ 1 ດອກ, ປັກສຽບ 1 ອັນ ພ້ອມດ້ວຍອຸປະກອນໄຟຟ້າໃນເຮືອນຮອດປະຈຸບັນຄິດເປັນມູນຄ່າ ການລົງທຶນກ່ອນ 1,8 ຕື້ກວ່າກີບ. ສ່ວນການສຳລະແມ່ນຈະເກັບນຳຄອບຄົວທີ່ໄດ້ຮັບນະໂຍບາຍດັ່ງກ່າວເດືອນລະ 20 ພັນກີບ ລວມທັງຄ່າກະແສໄຟຟ້າທີຕົນເອງຊົມໃຊ້.
ຈາກການຜະຕິບັດນະໂຍບາຍດັ່ງກ່າວເຫັນໄດ້ວ່າສາມາດປະກອບສ່ວນການແກ້ໄຂຄວາມທຸກຍາກຂອງປະຊາຊົນໄດ້ ຊຶ່ງສະແດງອອກຄອບຄົວໃດ, ບ້ານໃດໄດ້ມີໄຟຟ້າຊົມໃຊ້ເຮັດໃຫ້ຊີວິດການເປັນຢູ່ຂອງປະຊາຊົນມີການພັດທະນາດີຂຶ້ນ.
ນອກຈາກນີ້ໃນຕໍ່ໜ້າ ເພື່ອເຮັດໃຫ້ອັດຕາການຊົມໃຊ້ໄຟຟ້າໃນຄົວເຮືອນຢູ່ແຂວງຫົວພັນເພີ່ມຂຶ້ນທາງລັດວິສາຫະກິດໄຟຟ້າລາວສາແຂວງຫົວພັນພວມຈັດຕັ້ງປະຕິບັດໂຄງການຂະຫຍາຍຕາຂ່າຍໄຟຟ້າເຂົ້າສູ່ 7 ບ້ານເຂດກຸ່ມແຈຝາຍ ເມືອງແອດຄາດວ່າຈະໃຫ້ສຳເລັດໃນເດືອນມີຖຸນານີ້ເມື່ອສຳເລັດຈະມີຄອບຄົວໄດ້ໃຊ້ໄຟຟ້າ 300 ກວ່າຄົວເຮືອນ, ມູນຄ່າ 3,6 ຕື້ກີບ ແລະ ໃນ 6 ເດືອນທ້າຍ ປີ 2015 ຈະດຳເນີນໂຄງການເອົາໄຟຟ້າເຂົ້າບ້ານປ່າຍຸງ ເມືອງຊຳເໜືອ ແລະ ບ້ານພັນລໍເມືອງຮ້ຽມ ຖ້າໂຄງການດັ່ງກ່າວສຳເລັດຈະເຮັດໃຫ້ປະຊາຊົນສອງບ້ານມີ 100 ກວ່າຄອບຄົວໄດ້ຊົມໃຊ້ໄຟຟ້າ.
ແຫລ່ງຂ່າວຈາກ: ໜັງສືພີມເສດຖະກິດ-ສັງຄົມ